Ekonomia e Maqedonisë shënoi rritje reale prej 4.3% në tremujorin e dytë të vitit 2026, duke përshpejtuar ritmin në krahasim me rritjen prej 3.1% të regjistruar në tremujorin e parë. Ministrja e Financave, Gordana Dimitrieska-Koçoska, tha në konferencën e sotme për shtyp, ku prezantoi të dhënat e fundit të PBB-së nga Enti Shtetëror i Statistikave, se bëhet fjalë për një nga normat më të larta të rritjes tremujore në dy vitet e gjysmë të fundit.
Të lidhura
None found
Sipas saj, të dhënat dëshmojnë se nuk bëhet fjalë për një rezultat të izoluar, por për një proces të vazhdueshëm. Nga rritja prej 1.6% në tremujorin e parë të vitit 2024, ekonomia ka arritur në 4.3%, ndërsa për dhjetë tremujorë radhazi ka ruajtur ritme pozitive. Në pjesën më të madhe të kësaj periudhe, rritja ka qenë rreth ose mbi 3%, theksoi Dimitrieska-Koçoska.
Ministrja vuri në dukje se përmirësimi i aktivitetit ekonomik konfirmohet edhe nga krahasimi i dy gjysmëvjetorëve të vitit 2024. Rritja prej 2.3% në gjashtëmujorin e parë u përshpejtua në 3.6% në gjashtëmujorin e dytë. Gjatë vitit 2025, ekonomia shënoi rritje reale prej 3.5%, ndërsa ecuria pozitive vazhdoi edhe në vitin 2026.
Rritja e tremujorit të dytë, sipas saj, mbështetet në një bazë të gjerë të aktivitetit ekonomik. Investimet bruto u rritën realisht me 16.5%, ndërsa eksporti i mallrave dhe shërbimeve u zgjerua me 10.4%, pas rritjes prej 6.2% në tremujorin e parë.
Përmirësim është evidentuar edhe në sektorët prodhues. Ndërtimtaria u rrit me 21.9%, industria e përpunimit me 4.1%, tregtia, transporti dhe hoteleria me 4.1%, ndërsa sektori i informacionit dhe komunikimit me 4.3%. Në të njëjtën kohë, konsumi final u rrit me 2.8%, ndërsa konsumi i amvisërive me 3.3%.
“Rritja prej 4.3% në terma realë, respektivisht 8.3% në terma nominalë, është realizuar në një mjedis ekonomik dukshëm më të ndërlikuar, të karakterizuar nga rritje e moderuar e ekonomisë evropiane, pasiguri të vazhdueshme globale dhe rreziqe të theksuara gjeopolitike”, deklaroi Dimitrieska-Koçoska. Ajo shtoi se ky rezultat është veçanërisht i rëndësishëm për një ekonomi të vogël dhe të hapur, si ajo e Maqedonisë, e cila është e lidhur ngushtë me tregun evropian.
Me normën prej 4.3% në tremujorin e dytë të vitit 2026, Maqedonia renditet ndër ekonomitë evropiane me rritjen më të lartë. Sipas të dhënave të disponueshme, një rritje më të madhe kanë shënuar Sllovenia me 5%, Danimarka me 4.7% dhe Malta me 4.5%.
Ministrja theksoi se rezultati i Maqedonisë është dukshëm mbi mesataren e Bashkimit Evropian, e cila është 1.2%, si dhe mbi mesataren e eurozonës prej 1.0%. Në rajon, norma e rritjes së vendit është më e lartë se ajo e Serbisë prej 3.8%, Bullgarisë prej 2.5% dhe Kroacisë prej 1.7%.
Vazhdimësia e zhvillimeve pozitive shihet edhe në treguesit me frekuencë të lartë. Prodhimi industrial në tremujorin e dytë u rrit mesatarisht me rreth 4%, ndërsa ndërtimet e ulëta shënuan rritje mesatare prej 53.5%. Në korrik, prodhimi industrial u rrit me 1.3% në nivel vjetor, kurse industria e përpunimit regjistroi rritje prej 3.4%.
Paralelisht me përshpejtimin e aktivitetit ekonomik, inflacioni shënoi rënie të ndjeshme. Norma vjetore, e cila në maj ishte 4.8%, zbriti në 3.4% në qershor dhe në 2.3% në korrik. Kjo përfaqëson një ulje prej 2.5 pikë përqindjeje brenda vetëm dy muajve.
Dimitrieska-Koçoska bëri të ditur se Qeveria dhe Ministria e Financave do të vazhdojnë politikat që synojnë krijimin e kushteve për rritje më të lartë dhe të qëndrueshme, zbatimin e projekteve kapitale, përkrahjen e sektorit privat dhe investimeve, përmirësimin e klimës së biznesit dhe administrimin e përgjegjshëm të financave publike.
Qëllimi, sipas ministres, është që rezultatet pozitive të ekonomisë të përkthehen në një standard më të lartë jetese për qytetarët, më shumë mundësi për kompanitë, investime të reja dhe një ekonomi më të fuqishme e më konkurruese të Maqedonisë.
