“Mira Murati thotë se dëshiron që ju të keni një mundësi për të zgjedhur”. Me këtë fjali e hap revista prestigjioze TIME shkrimin kushtuar shqiptares së njohur, të cilën e ka renditur mes 100 personave që ndikojnë më shumë në zhvillimin dhe orientimin e Inteligjencës Artificiale në nivel botëror.
Të lidhura
None found
Për ish-drejtuesen e teknologjisë në OpenAI, ky vlerësim ka një rëndësi të veçantë. Murati është shndërruar në një prej personaliteteve me origjinë shqiptare më të spikatura në industrinë e AI-t. Në përzgjedhjen e këtij viti gjenden drejtues të kompanive kryesore teknologjike, studiues, sipërmarrës, politikëbërës, artistë dhe përfaqësues të industrisë krijuese, në një kohë kur AI po ushtron ndikim gjithnjë më të madh mbi ekonominë, shoqërinë dhe kulturën.
Në kopertinën globale të TIME100 AI 2026, Mira Murati paraqitet së bashku me disa nga emrat më të rëndësishëm të teknologjisë, përfshirë Sam Altman, Elon Musk, Dario Amodei, Jeff Bezos, Larry Ellison, Ilya Sutskever, Fei-Fei Li, Arvind Krishna dhe Eddie Wu.
TIME i ka klasifikuar 100 personazhet e përzgjedhur në katër grupe: Liderë, Inovatorë, Formësues dhe Mendimtarë. Përbërja e listës nuk kufizohet vetëm te fusha e teknologjisë, pasi në të janë përfshirë edhe emra nga politika, biznesi, arti dhe organizatat ndërkombëtare.
Sipas kryeredaktorit të TIME, Sam Jacobs, përzgjedhja e këtij viti paraqet një industri të Inteligjencës Artificiale që po bëhet gjithnjë e më “shpërthyese por edhe përçarëse”. Ai theksoi se në këtë sektor ndërthuren dhe përplasen interesa të natyrës teknologjike, ekonomike, politike dhe krijuese.
Në listën e revistës zënë vend gjithashtu shumë figura të industrisë kineze të teknologjisë dhe AI. Prania e tyre pasqyron forcimin e konkurrencës ndërmjet Kinës dhe Shteteve të Bashkuara në garën për zhvillimin dhe dominimin e teknologjive të Inteligjencës Artificiale.
