Analisti Ilir Kulla e lidhi kalimin e Erion Veliajt nga burgu në Tiranë në burgun e Fierit me një konflikt politik mes kryebashkiakut dhe kryeministrit Edi Rama, që sipas tij lidhet me drejtimin e Bashkisë së Tiranës.
Në një intervistë për emisionin “Zonë e Lirë” në News24, Kulla tha se përplasja mund të ketë nisur pas shkarkimit të nënkryetares së Bashkisë së Tiranës, rreth një muaj më parë. Sipas tij, Rama i kërkoi Veliajt të delegonte firmën dhe të caktonte si nënkryetar një figurë të njohur të shoqërisë civile, si zgjidhje në prag të zgjedhjeve të ardhshme.
Të lidhura
None found
Kulla pretendoi se Veliaj nuk pranoi t’ia kalonte firmën askujt dhe këmbënguli se do ta mbante detyrën deri në ditën kur të largohej nga posti. Ai tha gjithashtu se kryebashkiaku, gjatë qëndrimit në burg, nuk kishte marrë pagën që i takonte për një vit e gjysmë.
“Mendoj se arsyeja e vërtetë lidhet me një kërkesë që Rama i bëri Veliajt rreth një muaj më parë, pas shkarkimit të nënkryetares së Bashkisë. Meqë Veliaj nuk mund të jetë kandidat në zgjedhjet e ardhshme, Rama i kërkoi të emëronte një personazh shumë të njohur të shoqërisë civile.
Me synimin për zgjedhjet e ardhshme, të cilat Presidenti i Republikës i dekretoi sot, ai i kërkoi të delegonte firmën dhe të emëronte si nënkryetar një person publikisht të njohur. Për arsye personale, nuk do ta bëj publik emrin e tij.
Veliaj, në thelb, tha se nuk do t’ia delegonte firmën askujt dhe do të vazhdonte të qëndronte në detyrë deri në ditën kur të mos ishte më kryetar bashkie. Pasi e shkarkuan një herë dhe u rikthye nëpërmjet Gjykatës Kushtetuese, ai tha se nuk do t’ia kalonte firmën askujt. Kjo solli përplasjen.
Ai u përball në mënyrë shumë të rëndë me arrogancën dhe agresivitetin, ndërsa për një vit e gjysmë, edhe pse ndodhej në burg, nuk i ishte dhënë paga që i takonte si kryetar bashkie.
Këtu nisi përplasja dhe situata arriti në pikën ku jemi sot. Veliaj është transferuar, duke ua vështirësuar këtë gjë familjarëve të tij. Ndërkohë, burime që citonin sot zotin Rama thanë se Veliaj nuk është më me ne, sepse është me protestuesit.
Rama ka zgjedhur përfundimisht të distancohet nga Veliaj dhe të dalë përballë tij. Nga ana tjetër, çështja prek Bashkinë e Tiranës, më të madhen në vend. Përveç betejës juridike, është shtuar edhe ajo politike, brenda së njëjtës palë. Marrëdhënia, e cila prej kohësh ishte krisur, duket se po i afrohet fundit politik dhe personal”, u shpreh Kulla.
