Gjykata e Apelit e Qarkut të 9-të, me seli në San Francisko, nuk pranoi kërkesën e administratës së Donald Trump për pezullimin e numërimit të më shumë se 20 mijë fletëvotimeve postare në Kaliforni. Qeveria amerikane kishte pretenduar se disa nga votuesit mund të mos ishin shtetas të SHBA-së.
Ky është vendimi i dytë brenda një jave në të cilin kjo gjykatë hedh poshtë kërkesat urgjente të Departamentit të Drejtësisë për çështjen.
Të lidhura
None found
Me rezultat 2 me 1, shumica e gjyqtarëve vlerësoi se lista e përdorur nga administrata Trump për të identifikuar personat e dyshuar se nuk kanë shtetësi amerikane mund të mos jetë plotësisht e besueshme. Gjykatësit Mark Bennett, i emëruar nga Trump, dhe Gabriel Sanchez, i emëruar nga ish-presidenti Joe Biden, paralajmëruan se pranimi i kërkesës mund të dëmtonte të drejtat civile të mijëra qytetarëve.
“Ekziston një rrezik i konsiderueshëm që miratimi i kërkesës së SHBA-së (të qeverisë) do të çojë në privimin e të drejtave civile” për mijëra njerëz, thuhet në vendim.
Administrata Trump argumenton se në zgjedhje mund të votojnë edhe persona që nuk janë shtetas amerikanë, ndonëse të dhënat tregojnë se raste të tilla janë jashtëzakonisht të rralla.
Vendimi vjen në një periudhë me rëndësi politike për SHBA-në, teksa republikanët e Donald Trump synojnë të mbajnë shumicën në Kongres në zgjedhjet e mesit të mandatit.
Ndërkohë, votimi i hershëm ka regjistruar pjesëmarrje rekord: rreth 48 milionë amerikanë e kanë hedhur tashmë votën e tyre.
