Një situatë e pazakontë u regjistrua gjatë një seance gjyqësore në Milano, ku 26-vjeçarja Emanuela Maria Lamedica, e njohur si Lamedica në skenën muzikore, i kërkoi gjyqtares të lirohej nga qelia për të përmbushur një detyrim profesional: promovimin e këngës së saj të re në rrjetet sociale.
Të lidhura
None found
Artistja ndodhej në paraburgim pas kallëzimit të bërë nga gjyshja e saj, e cila e akuzon për keqtrajtim dhe fyerje verbale. Gjatë seancës për vlerësimin e masës së sigurisë, Lamedica iu drejtua gjyqtares Chiara Valori dhe kërkoi të kthehej në shtëpi, pasi kënga e re do të publikohej në Spotify dhe duhej të reklamohej në Instagram.
“Duhet të publikoj në Instagram për të promovuar këngën time”, ishte argumenti i paraqitur nga 26-vjeçarja.
Kërkesa e saj solli reagime dhe buzëqeshje në sallën e gjyqit. Megjithatë, gjyqtarja e mori vendimin duke u mbështetur te rrethanat ligjore të çështjes dhe jo te angazhimet artistike të të arrestuarës.
Sipas mbrojtjes, rasti lidhet me sjellje abuzive dhe ofendime verbale ndaj të moshuarës, ndërsa avokatja e Lamedicës ka nënvizuar se nuk kemi të bëjmë me një sulm fizik.
Gjatë seancës, këngëtarja foli edhe për kushtet në qelinë e burgut San Vittore, ku kishte kaluar natën.
Ajo këmbënguli gjithsesi se duhej të merrej me detyrimet profesionale. Kënga e re, “Maniere forti”, është pjesë e projektit të saj muzikor pas këngës “Barbie nel ghetto”.
Në përfundim, gjyqtarja Chiara Valori vendosi lirimin e 26-vjeçares nga burgu, por caktoi ndaj saj masa kufizuese.
Lamedica do të mbahet nën monitorim përmes një byzylyku elektronik dhe nuk do të ketë të drejtë të kontaktojë gjyshen e saj, e cila në këtë çështje konsiderohet palë e dëmtuar.
Pas vendimit, artistja mundi të kthehej në shtëpi dhe të vijonte aktivitetin në rrjetet sociale, ashtu siç kishte deklaruar në sallën e gjyqit.
Më vonë, ajo publikoi në Instagram materiale për promovimin e këngës së re. Në postimet e saj, Lamedica e cilësoi atë si një prej hiteve të vitit 2026 dhe u kërkoi ndjekësve ta dëgjonin e ta shpërndanin.
“Ndajeni me të gjithë, veçanërisht me armiqtë e mi”, shkroi ajo në një prej postimeve.
