Autoritetet greke po vijojnë me intensitet hetimet për vrasjen e 45-vjeçares në Nea Smyrni, duke e përqendruar vëmendjen te raporti që viktima kishte me 48-vjeçarin e dyshuar si autor i krimit. Në përpjekje për të rindërtuar ngjarjen që i parapriu vrasjes, po shqyrtohen provat e sekuestruara në banesa, si edhe të dhënat e telefonave celularë.
Mediat greke raportojnë se policia ka siguruar një regjistrim filmik që dokumenton lëvizjet në pallatin ku ndodhi krimi, pak çaste përpara të shtënave. Sipas elementeve të para, dyshohet se 48-vjeçari kishte caktuar një person të qëndronte pranë banesës së 45-vjeçares, ndërsa vetë priste që ajo të dilte jashtë.
Të lidhura
None found
Sapo gruaja doli nga dera e apartamentit, 48-vjeçari dyshohet se e kërcënoi me revolver dhe e detyroi të ulej në gjunjë. Më pas, ndaj saj u qëllua dy herë. Të njëjtat burime bëjnë me dije se plumbi i parë nuk e preku viktimën, ndërsa i dyti rezultoi vdekjeprurës.
Hetuesit po verifikojnë edhe dyshimet se 45-vjeçarja mund të ishte kërcënuar më parë nga 48-vjeçari. Informacionet e publikuara tregojnë se ajo kishte frikë për jetën dhe kishte marrë masa mbrojtëse, mes tyre edhe ndërrimin e bravave në banesën ku jetonte së bashku me vajzën e saj të mitur.
Ndërkohë, pjesë e verifikimeve janë bërë edhe sendet e gjetura në automjetin e 48-vjeçarit. Dyshohet se në të janë zbuluar fishekë me të njëjtin kalibër si ata që u përdorën në vrasje, ndërsa revolveri që dyshohet se shërbeu për kryerjen e krimit cilësohet si armë relativisht e re.
