Një raportim investigativ i CNN ka zbuluar të dhëna të reja rreth sulmit ndaj oligarkut ukrainas Vadim Yermolaev në Monako, si dhe zhvillimeve të pazakonta që ndodhën pas atentatit.
Të lidhura
None found
Yermolaev arriti të mbijetojë pas shpërthimit pranë banesës së tij. Ndërkohë, Anastasia Berezovskaya, gruaja e dyshuar si pjesë e planit, u largua nga Monako dhe disa ditë më pas u gjet e vrarë në Ukrainë, me një plumb në kokë.
Burime të afërta me hetimin ukrainas dyshojnë se Berezovskaya mund të ketë qenë vetëm një zbatuese e rekrutuar kundrejt pagesës. Të dhënat e hetimit tregojnë se ajo kishte marrë nga 6 deri në 7 mijë euro përmes transfertave bankare dhe kriptomonedhave. Pas largimit nga Monako dhe kthimit në Ukrainë, ajo u rrëmbye nga dy persona dhe më vonë u vra.
Për vrasjen e saj dyshohen Vladislav Reut dhe Vitaly Zykovich, të cilët kanë paraqitur rrëfime të ndryshme për atë që ka ndodhur. Reut, që gjatë atentatit në Monako shërbente si oficer i Inteligjencës së Mbrojtjes së Ukrainës (GUR), e ka pranuar përfshirjen, por thotë se ka vepruar pa dijeninë e eprorëve. Autoritetet ukrainase, nga ana tjetër, mohojnë që shërbimi inteligjent të ketë lidhje me ngjarjen.
Yermolaev vetë shprehet se nuk mendon që urdhri për eliminimin e tij ka ardhur nga shteti ukrainas. Megjithatë, ai beson se persona me përvojë në operacione të fshehta mund të jenë angazhuar privatisht nga dikush.
“Përcaktimi se kush e urdhëroi, kjo është pyetja kryesore sot”, tha ai në një deklaratë për CNN. Pavarësisht hetimit, mbetet ende e paqartë se kush e porositi atentatin dhe cili ishte motivi për shënjestrimin e oligarkut ukrainas.
