Vladimir Putin ka pretenduar se Ukraina, herët ose vonë, do të mbetet pa “tokat perëndimore”, të cilat presidenti rus thotë se historikisht kanë qenë pjesë e kombeve të tjera të Evropës.
Të lidhura
None found
Deklaratat u bënë gjatë një takimi të Putinit me pjesëtarë të marinës ruse, të organizuar me rastin e Ditës së Marinës.
Duke folur për zonat që, sipas tij, dikur i përkisnin Polonisë, Hungarisë dhe Rumanisë, ai u shpreh: “Jam i sigurt se herët a vonë Ukraina do t’i humbë këto toka perëndimore”.
Putini shtoi se kjo mund të mos ndodhë menjëherë: “Jo nesër, ndoshta jo pasnesër, pas një viti, dy, 10 apo 15 vjetësh, por gjithçka do të vendoset në vendin e vet nga këndvështrimi historik”.
Ekspertët e komunikimit e shohin këtë si një deklaratë të paramenduar të kreut të Kremlinit, që synon të aktivizojë grupet nacionaliste në Poloni, Hungari dhe Rumani, të cilat besojnë se këto territore u takojnë vendeve të tyre, duke nxitur kështu tensione të brendshme në këto shtete.
Në të njëjtën kohë, të hënën u raportua se përfaqësues ukrainas dhe amerikanë kishin shqyrtuar një propozim për t’i paraqitur Rusisë mundësinë e një armëpushimi ajror.
Dmitry Peskov, zëdhënësi i Kremlinit, deklaroi se Moska e vlerësonte si të parakohshëm çdo koment rreth një propozimi të tillë për armëpushim.
