Akuzat ndaj Kimberly Guilfoyle, ish-ambasadores amerikane në Greqi, kanë nxitur reagimin e zëvendëspresidentit të Shteteve të Bashkuara, J.D. Vance. Pas raportimeve për sjellje të papërshtatshme, për të u kërkua largimi. Vance e përshkroi shitjen e aksesit te zyrtarët e Shtëpisë së Bardhë si “të neveritshme” dhe “të përçmueshme”.
Të lidhura
None found
Në një pjesë të intervistës për “CBS Evening News”, e cila do të transmetohet të shtunën, ai tha se çdo person që kërkon të fitojë para duke ofruar akses në administratën amerikane duhet të vuajë pasojat.
“Para së gjithash, nëse dikush po shet akses në Shtëpinë e Bardhë, kjo është e neveritshme dhe e përçmueshme dhe duhet të vuajë pasojat”, deklaroi Vance.
Deklaratat e tij pasojnë raportimet mbi pretendimin e Eric Deters, ish-donator i Donald Trump, se Guilfoyle i kishte kërkuar t’i transferonte 100 mijë dollarë për të shlyer një kartë krediti. Sipas tij, kërkesa ishte bërë në ditët para se Senati ta konfirmonte atë si ambasadore dhe, në këmbim, ajo i kishte premtuar akses e mbështetje brenda administratës Trump.
Vance sqaroi se nuk dëshiron të mbështetet vetëm te lajmet e publikuara për të arritur në një përfundim. “Dua të formoj një mendim për këto çështje bazuar në fakte dhe jo në ndonjë raport të rastësishëm mediatik që kam lexuar”, tha ai.
Kur u pyet nëse administrata amerikane do t’u përgjigjej thirrjeve gjyqësore lidhur me çështjen Guilfoyle, zëvendëspresidenti pohoi se do ta bënte këtë dhe theksoi detyrimin e qeverisë për të zbatuar ligjin. “Sigurisht që do të veproja. Dëgjoni, ne ndjekim ligjin”, u përgjigj ai.
Guilfoyle u betua si ambasadore e Shteteve të Bashkuara në Greqi në shtator të vitit 2025. Më pas, ajo u vu në qendër të raportimeve për kërkesa të dyshuara për para në këmbim të aksesit te zyrtarët e administratës, pranimin e dhuratave luksoze dhe përfshirjen e një lobisti në takime zyrtare.
Avokatët e Guilfoyle i kanë hedhur poshtë akuzat. Sipas tyre, shuma e përmendur nga Deters përfaqësonte pagesa të prapambetura për shërbime konsulence dhe fjalime. Departamenti amerikan i Shtetit, ndërkohë, po heton pretendimet për sjellje të papërshtatshme.
