Vincenza Giannini, 74 vjeçe, dhe bashkëshorti i saj, Pier Ferdinando Casari, 83 vjeç, janë viktimat e një krimi të rëndë të zbuluar në Mirandola, në provincën e Modenës, Itali.
Të lidhura
None found
Çifti i moshuar u gjet i vrarë dhe me kokat e prera brenda banesës së tij të enjten në mbrëmje. Në vendngjarje shkuan karabinierët, forcat e policisë dhe ekipet e urgjencës mjekësore.
Autoritetet ende nuk kanë bërë të ditur se kush i lajmëroi për praninë e dy trupave në shtëpi.
Si autor i dyshuar për vrasjen e dyfishtë është ndaluar Daniele Tavoni, 54 vjeç, djali i Vincenza Gianninit nga një martesë e mëparshme.
Gjatë kontrolleve në banesën ku Tavoni jetonte pranë shtëpisë së viktimave, hetuesit sekuestruan mjete që mbanin gjurmë të shumta gjaku. Sipas dyshimeve, ato mund të jenë përdorur gjatë kryerjes së krimit.
Tavoni u mor në pyetje që në mbrëmjen e së enjtes. Nga rindërtimi paraprak i ngjarjes dyshohet se ai kishte pasur konflikte të përsëritura me çiftin për çështje ekonomike.
Pas ndalimit, 54-vjeçari u dërgua në burgun e Modenës. Prokuroria pritet t’i drejtohet gjyqtarit kompetent për të vërtetuar ligjshmërinë e ndalimit dhe për caktimin e një mase sigurie.
Hetimet vijojnë për të sqaruar të gjitha rrethanat e ngjarjes, e cila konsiderohet ndër më të rëndat e regjistruara së fundmi në zonën e Modenës.
