VLEN ka drejtuar akuza ndaj Arben Taravarit, duke pretenduar se ai po shmang përgjegjësinë për problemin e ndotjes së ujit në Gostivar.
Të lidhura
None found
Sipas VLEN-it, qëndrimet e Taravarit bien në kundërshtim me njëri-tjetrin. Nga kjo parti kujtojnë se dikur ai dilte para gostivarasve dhe e fajësonte pushtetin e atëhershëm se, për shkak të neglizhencës dhe mungesës së veprimit, po i “helmonte” qytetarët. Ndërkohë, gjatë mandatit të tij, ai deklaronte se çështjen e ujit në Gostivar po e zgjidhte “për 100 vitet e ardhshme”.
VLEN pretendon se Taravari jo vetëm që nuk i realizoi premtimet, por tani, kur barra e përgjegjësisë i takon administratës që ai drejtoi, nuk po mban as përgjegjësi politike. Dy rezervuarët gjigantë, të paralajmëruar prej tij në vitin 2022 si zgjidhje për furnizimin me ujë të pijshëm dhe si donacion nga Zvicra, gjithashtu nuk u ndërtuan.
Në këtë kuadër, VLEN pyet se ku përfunduan 7 milionë eurot e ndihmës zvicerane. Njëkohësisht, partia ngre edhe pyetjen nëse uji i Gostivarit po përfundon njësoj si kanalizimi i Zajazit.
Nga VLEN e cilësojnë situatën si thellësisht ironike, pasi, sipas tyre, kritikat që Taravari ua adresonte dikur rivalëve politikë sot dëshmojnë më qartë dështimin e tij. Ata theksojnë se standardet nuk duhet të përshtaten sipas interesave politike dhe se, nëse në vitin 2017 mjaftonte çdo dyshim për të ngritur akuza të rënda, faktet e sotme e bëjnë gjendjen edhe më shqetësuese.
Qytetarëve, sipas VLEN-it, nuk u duhen justifikime apo heshtje, por transparencë, llogaridhënie dhe marrje përgjegjësie. Ata presin ujë të sigurt dhe institucione funksionale.
VLEN kërkon që çdo zyrtar që ka dështuar të mbrojë shëndetin publik të mbajë përgjegjësi të plotë, si dhe që e vërteta të zbardhet në tërësi. Sipas partisë, askush nuk mund të përdorë postin, përkatësinë partiake apo heshtjen për t’iu shmangur përgjegjësisë.
Në përfundim, nga VLEN deklarojnë se Arben Taravari duhet t’u japë përgjigje qytetarëve të Gostivarit duke zbatuar të njëjtin standard që kërkonte më parë prej të tjerëve. Përgjegjësia, theksojnë ata, nuk është vetëm një slogan opozitar, por detyrim edhe kur drejtohet pushteti lokal./Telegrafi/
