Për të festuar 25 vjet të pranisë së saj në tregun japonez, Lamborghini ka krijuar një variant të posaçëm të Revuelto Impavido. Ky edicion do t’u ofrohet vetëm klientëve në Japoni dhe prodhimi i tij do të kufizohet në 25 ekzemplarë.
Të lidhura
None found
Koncepti i modelit mbështetet te Bushido, kodi tradicional i nderit i samurajëve japonezë, i lidhur me vlera si disiplina, guximi dhe vendosmëria.
Pamja e jashtme huazon tipare nga armaturat e samurajëve. Karroceria karakterizohet nga vija të spikatura dhe zbukurime në ngjyrë ari, të vendosura në kapak, çati, pjesën e pasme dhe parakolp.
Në pjesën ballore është integruar një motiv që i referohet maedate-s, stemës dekorative të përdorur dikur në helmetat e samurajëve. Edhe pjesë të tjera të karrocerisë janë konceptuar për të sjellë në mendje ndërtimin e armaturave tradicionale japoneze.
Për konfigurimin e automjetit do të ofrohen katër kombinime të veçanta ngjyrash: Verde Campus, Grigio Artis Lucido, Grigio Crater Matt dhe Rosso Pyra.
Elementet dalluese vazhdojnë edhe në kabinë, ku përfshihen lëkura Nero Ade, qepje të personalizuara dhe simboli i samurajit. Secili ekzemplar do të pajiset gjithashtu me një pllakë prej fibrash karboni, të shënuar individualisht me një numër nga 1 deri në 25.
Në aspektin mekanik, Revuelto Impavido përdor të njëjtin sistem hibrid si modeli standard. Motori V12 me kapacitet 6.5 litra bashkëpunon me tre motorë elektrikë, ndërsa fuqia e përgjithshme arrin në rreth 1001 kuaj/fuqi.
Lamborghini ende nuk e ka bërë publik çmimin e këtij versioni, por prodhimi në një numër kaq të vogël pritet t’ia rrisë më tej ekskluzivitetin.
Përmes këtij edicioni special, marka italiane synon të ndërthurë teknologjinë e superveturave të saj me traditën dhe simbolikën e Japonisë, duke ofruar një automjet unik për koleksionistët.
