Aston Villa ka hyrë në garë me Romën për Alejandro Garnachon, pasi klubi i drejtuar nga Unai Emery ka paraqitur një propozim për ta marrë anësorin e Chelseat në huazim për një sezon.
Të lidhura
None found
Sipas “The Athletic”, marrëveshja e propozuar përfshin edhe një detyrim blerjeje në rast se përmbushen disa kushte, por palët ende nuk kanë gjetur gjuhën e përbashkët për detajet dhe shifrat e transferimit.
Fabrizio Romano bën të ditur se bisedimet po vijojnë, ndërsa Unai Emery e ka dhënë miratimin për ta pasur Garnachon në listën e objektivave të tij. Trajneri spanjoll ishte përpjekur ta sillte lojtarin edhe gjatë verës së kaluar, kur argjentinasi u largua nga Manchester United, por atëherë Chelsea triumfoi në garën për firmën e tij.
Situata e Garnachos është komplikuar pas një sezoni zhgënjyes në Stamford Bridge. Trajneri i sapoemëruar i Chelseat, Xabi Alonso, ka sinjalizuar se 22-vjeçari nuk përfshihet në planet e tij për sezonin 2026/27, duke e bërë të mundshëm largimin e futbollistit gjatë kësaj vere.
Më herët ishte raportuar se Roma kishte bërë një ofertë zyrtare për Garnachon, por tashmë klubi italian duhet të përballet me interesimin e Aston Villas.
Gjatë sezonit 2025/26, Chelsea kaloi një periudhë të dobët dhe mbeti edhe jashtë Ligës së Konferencës. Për këtë arsye, klubi është fokusuar më tepër te largimet, ndërsa Xabi Alonso nuk dëshiron të mbajë në ekip futbollistë që nuk përputhen me idetë e tij ose që kanë nevojë për një nisje të re.
Një huazim i Garnachos do t’i shërbente gjithashtu Chelseat në aspektin financiar, veçanërisht pasi raportohet se klubi ka arritur marrëveshje rekord prej 157.3 milionë dollarësh për Morgan Rogers, mesfushorin ofensiv të Aston Villas.
Garnacho shënoi vetëm tetë gola në sezonin e fundit, gjashtë prej të cilëve në garat e kupës, dhe regjistroi katër asistime në 43 paraqitje. Performancat e tij, sidomos në 24 ndeshjet e Ligës Premier, ishin të luhatshme dhe nuk mjaftuan për ta bindur Alonson se ai duhet të jetë pjesë e projektit të ri.
Edhe pse huazimi nuk është zgjidhja ideale për një lojtar që firmosi vetëm verën e kaluar një kontratë shtatëvjeçare me Chelsean, ndryshimi i ambientit shihet si i nevojshëm për argjentinasin pas këtij sezoni për t’u harruar.
Një transferim te Aston Villa do t’i jepte atij mundësinë të rikthejë formën nën drejtimin e një trajneri që e ka vlerësuar prej kohësh. Për më tepër, Garnacho do të mund të luante në Ligën e Kampionëve me klubin nga Birmingham, kompeticion që Chelsea nuk mund t’ia ofrojë sezonin e ardhshëm.
Ndërkohë, Chelsea po punon edhe për përforcimin e repartit defensiv. Në listën e interesimeve të klubit janë John Stones, tashmë lojtar i lirë pas përfundimit të kontratës me Manchester Cityn, dhe qendërmbrojtësi i Crystal Palace, Maxence Lacroix.
