Pesë persona humbën jetën në shtetin e Ohajos, në Shtetet e Bashkuara, pasi hynë në një lumë për t’i ardhur në ndihmë një personi që rrezikonte të mbytej.
Stacioni lokal WMAR-2 raportoi se tragjedia ndodhi të dielën në lumin Scioto, në periferi të Powell, pranë qytetit të Columbus. Në atë zonë ishte mbledhur një grup njerëzish për të kaluar ditën e pushimit.
Të lidhura
None found
Sherifi i Qarkut Delaware, Jeffrey Balzer, tha se ngjarja nisi kur një pjesëtar i grupit hyri për të notuar, por papritur u gjend në vështirësi.
Duke përshkruar momentet që pasuan, sherifi deklaroi se “nga ai moment, tragjedia filloi të zhvillohej”. Persona të tjerë u futën në ujë për ta shpëtuar, por rryma mori edhe ata.
Të dielën, ekipet e emergjencës që shkuan në vendngjarje gjetën dy gra në lumë. Ato u dërguan me urgjencë në spital, por mjekët nuk mundën t’i mbanin në jetë.
Operacioni i kërkimit vazhdoi të hënën. Autoritetet nxorën nga uji trupat e tre burrave të tjerë, ndërsa bilanci përfundimtar i viktimave arriti në pesë.
Alarmi u dha përmes një telefonate në numrin e emergjencës 911. Një shofer që po kalonte në zonë pa një fëmijë të frikësuar, i cili vraponte i vetëm në rrugë dhe kërkonte ndihmë, dhe më pas njoftoi autoritetet.
Dy fëmijë më të vegjël se 10 vjeç mbijetuan dhe janë lënë përkohësisht nën përkujdesjen e shërbimeve sociale, në pritje që të merren nga të afërmit. Njëri prej tyre është fëmija që mundi të largohej nga vendi dhe të sinjalizonte për ngjarjen.
Hetimet e autoriteteve lokale po vazhdojnë për të përcaktuar të gjitha rrethanat e tragjedisë, ku pesë persona humbën jetën teksa përpiqeshin të shpëtonin një tjetër.
