Ish-deputeti i Partisë Demokratike të Kosovës, Xhavit Haliti, vlerëson se PDK-ja nuk duhet ta mbyllë derën për një marrëveshje politike me Lëvizjen Vetëvendosje. Ai thotë se një bashkëpunim i mundshëm duhet të bazohet në dakordim për qeverisjen dhe jo të kufizohet vetëm te zgjedhja e presidentit.
Të lidhura
None found
Në emisionin “Intervista e Javës” të KosovaPress, Haliti u shpreh se marrëveshja mes dy subjekteve do të duhej të siguronte një program të përbashkët qeverisës për një mandat të plotë katërvjeçar.
Sipas tij, fillimisht PDK-ja dhe VV-ja duhet të pajtohen për bashkëqeverisje, ndërsa më pas mund të zgjidhet presidenti dhe të nisin negociatat për realizimin e projektit e programit të përbashkët katërvjeçar. Haliti tha se numrat ekzistojnë, por shtoi se jo të gjithë në PDK ndajnë të njëjtin qëndrim për koalicionin me Vetëvendosjen.
Ai theksoi se çështja duhet të shqyrtohet në organet e partisë dhe në këshillin drejtues. Nëse nuk arrihet pajtim, sipas Halitit, mendimet duhet të vihen në votim, ndërsa vendimi që del prej tij duhet të jetë i detyrueshëm për të gjithë. Ai deklaroi se personalisht nuk e sheh si të keqe një marrëveshje, pasi PDK-ja dhe VV-ja janë kundërshtarë politikë e jo armiq, ndonëse tha se nuk beson se kjo do të ndodhë, por se gjithçka mund të ndodhë.
Duke folur për kundërshtimet ndaj një bashkëpunimi të tillë, Haliti përmendi Sami Lushtakun, i cili publikisht ka shfaqur rezerva për një koalicion me LVV-në. Ai shtoi se Lushtaku nuk është i vetëm në këtë qëndrim.
Haliti tha se e ka dëgjuar qëndrimin e Samiut dhe se ai ka të drejtë të ketë mendimin e vet. Sipas tij, Lushtaku përfaqëson një zonë dhe një numër të madh të elektoratit, ka ndikim të konsiderueshëm në parti dhe deklaratat e tij duhet të merren në shqyrtim.
Ish-deputeti i PDK-së deklaroi se Lushtaku asnjëherë nuk i ka thënë atij personalisht se nuk pajtohet me një veprim të tillë ose se nuk duhet të veprohet në atë mënyrë. Ai tha se Lushtaku i ka bërë publike qëndrimet e tij dhe mund të ketë raporte më intime me persona të tjerë, por në raport me të nuk ka pasur një rast të tillë. Haliti shtoi se Lushtaku ka pasur përplasje politike me njerëz të Vetëvendosjes dhe me Vetëvendosjen, prandaj është krejtësisht normale që ai të jetë kundër bashkëpunimit me VV-në.
Sa i përket zgjedhjes së presidentit, Haliti tha se PDK-ja nuk ka obligim të mbështesë një kandidat nëse nuk ka koalicion me LVV-në. Megjithatë, ai vlerësoi se arsyeshmëria mund të mbizotërojë mbi interesat, me qëllim krijimin e institucioneve dhe nisjen e procesit të Kosovës nga pika ku ka mbetur.
Në rast se nuk arrihet koalicion me VV-në, Haliti tha se PDK-ja duhet të përgatitet për një betejë të madhe të brendshme, në kuptimin pozitiv, për konsolidimin e saj dhe për katër vjet në opozitë. Ai u shpreh se nuk ka kandidat konsensual për president, pasi politika funksionon mbi interesa të dyanshme, dhe tha se nuk e di se kush mund të ishte president konsensual mes PDK-së dhe Vetëvendosjes.
Haliti foli edhe për takimin e fundit të 10 korrikut mes kryetarit të PDK-së, Bedri Hamza, dhe liderit të LVV-së, Albin Kurti. Ai tha se nuk e di nëse bisedimet janë ndërprerë pas propozimeve ose kushteve të paraqitura nga Hamza, pasi nuk ka qenë pjesë e takimit dhe nuk është zëdhënës i tij.
Ai tha se beson që Hamza ka paraqitur kushtet e PDK-së, përfshirë projektin ekonomik që Bedri Hamza e kishte si kandidat për kryeministër dhe çështjen e koalicionit. Haliti deklaroi se nuk mund të ketë koalicion vetëm për shkak të zgjedhjes së një presidenti të propozuar nga PDK-ja, edhe nëse ai nuk është pjesë e PDK-së.
Sipas Halitit, mund të ketë përgjegjshmëri politike nga kryetari i partisë për të mos bllokuar procesin. Ai përmendi mundësinë e një vendimi të palëvizshëm dhe të pandryshueshëm që PDK-ja të mbetet në opozitë, ndërsa të zgjidhet presidenti për t’i hapur mundësi zgjedhjeve.
Në intervistë, Haliti komentoi edhe zhvillimet e fundit në Lidhjen Demokratike të Kosovës dhe garën për udhëheqjen e saj. Ai mohoi se PDK-ja ka interes ose preferencë për personin që do të udhëheqë LDK-në.
Ai tha se nuk qëndron pretendimi se PDK-ja zgjedh personin që vjen pas udhëheqësit aktual të LDK-së. Sipas Halitit, mund të ketë miqësi dhe raporte miqësore mes individëve, por nuk ekziston një afërsi e tillë mes dy partive sa të diskutohet nëse PDK-së i pëlqen apo jo kryetari i LDK-së.
Haliti theksoi se partitë zakonisht mund të kenë preferenca ose të dëshirojnë të kenë marrëdhënie më të mira me kryetarë të caktuar, sepse mund të merren vesh më lehtë për vendime të mëvonshme. Megjithatë, ai tha se secila parti, përfshirë PDK-në, duhet të dëshirojë që LDK-ja të jetë një parti serioze, e bashkuar, me idealet e saj dhe të vazhdojë jetën politike në Kosovë.
Për raportet e tij me kryetarin e Pejës nga radhët e LDK-së, Gazmend Muhaxheri, Haliti tha se ka marrëdhënie të mira me të. Ai sqaroi se koalicioni në komunë nuk nënkupton se ka ndikim te kërkesat e Muhaxherit për shkarkimin ose zgjedhjen e kryetarit të Lidhjes Demokratike. Haliti shtoi se ende nuk ka biseduar me Muhaxherin për të kuptuar nëse ai ka preferencë dhe si qëndrojnë punët në këtë çështje.
