Lutfi Haziri, nënkryetar i Lidhjes Demokratike të Kosovës (LDK), ka komentuar kritikat dhe zhvillimet e fundit brenda partisë, duke deklaruar se sfidat do të kapërcehen përmes debatit të brendshëm dhe funksionimit demokratik.
Të lidhura
None found
Në një reagim në rrjetet sociale, Haziri u shpreh se i mirëkupton aktivistët dhe anëtarët që synojnë ta rikthejnë LDK-në si forcën e parë politike. Megjithatë, ai kritikoi ata që, sipas tij, fillimisht e vlerësuan partinë e më pas nisën t’i “shkruajnë nekrologji”.
Sipas Hazirit, LDK-ja është e anëtarësisë dhe jo e funksionarëve. Ai tha se subjekti politik ka mundësi t’u përgjigjet sfidave të Republikës përmes marrëveshjeve politike, diskutimit të brendshëm dhe ruajtjes së demokracisë brenda partisë.
“Pa LDK-në nuk ka as zgjidhje e as zgjedhje. Stabiliteti dhe normalizimi i Republikës kalon përmes zyrave të LDK-së”, ka shkruar Haziri, duke shtuar se rikthimi i madh i partisë do të arrihet me një marrëveshje të gjerë politike, pa e dëmtuar demokracinë e brendshme.
