Të paktën dy persona humbën jetën dhe pesë të tjerë u plagosën pas një sulmi rus me raketa balistike që goditi gjatë natës kryeqytetin e Ukrainës, Kievin. Bilanci është konfirmuar nga shërbimet ukrainase të emergjencës.
Të lidhura
None found
Para se të dëgjoheshin shpërthimet, Forcat Ajrore të Ukrainës paralajmëruan për lëvizjen e disa raketave balistike në drejtim të kryeqytetit. Më pas, shpërthime të fuqishme u raportuan në disa pjesë të Kievit.
Goditja preku lagjen Darnytskyi, në lindje të qytetit, ku fragmentet e raketave ranë mbi godina jo-banesore dhe shkaktuan vdekjen e dy personave. Gjatë bombardimeve u godit edhe një magazinë në lagjen Sviatoshynskyi, në pjesën perëndimore të Kievit.
Sulmi ndodhi vetëm disa orë pasi presidentja e Komisionit Evropian, Ursula von der Leyen, kishte vizituar Kievin. Ajo ndodhej në Ukrainë për të forcuar bashkëpunimin në fushën e mbrojtjes mes Bashkimit Evropian dhe Kievit.
Autoritetet ukrainase po vazhdojnë kërkim-shpëtimin, ndërsa paralelisht po përcaktojnë dëmet e shkaktuara nga sulmi i fundit rus.
