Julian Alvarez mbetet padyshim një prej emrave më të përfolur në këtë afat kalimtar veror. Fillimisht Barcelona dukej se kryesonte garën për sulmuesin argjentinas, por së fundmi edhe Arsenali ka hyrë me forcë në skenë.
Të lidhura
None found
Burime nga The Independent tregojnë se klubi londinez po nxiton të finalizojë transferimin, pasi trajneri Mikel Arteta e konsideron 26-vjeçarin si përforcimin ideal për vijën e sulmit. Qëllimi i “Topçinjve” është që lojtari t’i bashkohet skuadrës sapo të nisë përgatitjet më 20 korrik.
Megjithatë, ky operacion parashikohet të jetë tejet i ndërlikuar. Vetë Alvarez duket se e preferon të ardhmen në futbollin spanjoll, ku në krye të listës së tij qëndrojnë Barcelona dhe Real Madridi.
Sfida më e madhe për çdo pretendente mbetet pozicioni i palëkundur i Atletico Madridit. Drejtuesit e klubit kryeqytetas nuk kanë asnjë synim për të shitur një prej lojtarëve të tyre më të çmuar dhe vazhdojnë të kthejnë mbrapsht të gjitha propozimet që u vijnë.
Burime pranë negociatave bëjnë të ditur se Arsenali është gati të derdhë deri në 105 milionë euro, ndërkohë që Real Madridi më herët ka treguar gatishmëri të kalojë edhe shifrën e 120 milionë eurove.
Për më tepër, raportimet flasin se së fundi Atletico Madrid ka hedhur poshtë një ofertë prej 150 milionë eurosh për Alvarezin, duke dhënë kështu një sinjal të qartë se nuk ka ndërmend të heqë dorë nga bomberi argjentinas, i cili ka një kontratë të vlefshme deri në verën e vitit 2030.
Edhe Barcelona vijon të qëndrojë në lojë, por gjendja e brishtë financiare e katalanasve e bën misionin thuajse të pamundur. Presidenti Joan Laporta e ka thënë troç se propozimi i blaugranëve nuk do të rrijë pezull pambarimisht.
Gazetari i njohur Fabrizio Romano e citon Laportën të ketë deklaruar: “Oferta jonë fillestare është ende mbi tavolinë, por ajo nuk do të ketë vlefshmëri pafundësisht.”
Me përfshirjen e Barcelonës, Real Madridit, Arsenalit dhe më parë edhe të Paris Saint-Germainit, e ardhmja e Julian Alvarez pritet të mbetet një ndër çështjet më të nxehta të kësaj merkatoje verore.
