Pavarësisht Memorandumit të Mirëkuptimit të firmosur nga Shtetet e Bashkuara dhe Irani, marrëdhëniet mes dy vendeve janë tensionuar sërish.
Ngjarjet e regjistruara në orët e fundit në Ngushticën e Hormuzit kanë hapur një tjetër përballje ushtarake. Një anije me flamur qipriot u sulmua teksa po kalonte në këtë rrugë detare me rëndësi strategjike, ndërsa SHBA-ja iu përgjigj me një seri bombardimesh kundër objektivave iraniane.
Të lidhura
None found
Komanda Qendrore e SHBA-së (CENTCOM) bëri të ditur se një pjesëtar i ekuipazhit të anijes kontejnerike M/V GFS Galaxy figuron i zhdukur pas sulmit. Autoritetet britanike të sigurisë detare njoftuan se, për shkak të zjarrit në bord, ekuipazhi u detyrua ta braktiste mjetin lundrues dhe më pas u shpëtua nga autoritetet përgjegjëse.
Marina iraniane tha se fillimisht kishte hapur zjarr paralajmërues ndaj anijes, duke pretenduar se ajo po lëvizte në një itinerar të paautorizuar dhe se kishte fikur sistemin e identifikimit të pozicionit. Më pas, mediat iraniane raportuan se anija ishte goditur nga një raketë lundrimi pasi kishte shpërfillur urdhrat e autoriteteve iraniane.
Pas këtij incidenti, SHBA-ja kreu një tjetër valë sulmesh ajrore, e treta gjatë kësaj jave. Sipas CENTCOM, forcat amerikane goditën afro 140 objektiva ushtarake iraniane duke përdorur municione precize të lëshuara nga avionë luftarakë, dronë dhe mjete detare.
Në mesin e objektivave të goditura ishin baza raketore, pozicione dronësh, kapacitete detare, depo municionesh, rrjete komunikimi dhe sisteme mbikëqyrjeje bregdetare.
Sekretari amerikan i Mbrojtjes, Pete Hegseth, u shpreh se Irani “bëri një zgjedhje të keqe” kur sulmoi një anije tregtare në Ngushticën e Hormuzit dhe se “tani po paguan çmimin”.
CENTCOM deklaroi se në tre operacionet e fundit janë goditur mbi 300 objektiva iraniane, me qëllim dobësimin e kapaciteteve të Teheranit për të kërcënuar lirinë e lundrimit në një prej korridoreve detare më të rëndësishme në botë. Po ashtu, komanda amerikane tha se që nga fillimi i majit ka ndihmuar në kalimin e sigurt të më shumë se 800 anijeve tregtare dhe rreth 400 milionë fuçive naftë të papërpunuar përmes Ngushticës së Hormuzit.
Ndërkohë, pas bombardimeve amerikane, u raportuan shpërthime në disa vende të rajonit, mes tyre Kuvajti, Bahreini, Katari, Emiratet e Bashkuara Arabe dhe Jordania.
Nga ana tjetër, Garda Revolucionare iraniane pretendoi se kishte goditur një bazë ushtarake në Jordani, nga ku sipas saj operojnë dronët amerikanë MQ-9. Më tej, ajo njoftoi se kishte sulmuar edhe një anije të dytë në Ngushticën e Hormuzit, si edhe bazën ajrore amerikane Al Udeid në Katar me raketa balistike.
Sipas pretendimeve iraniane, sulmi shkaktoi dëme në qendrën e mirëmbajtjes së avionëve luftarakë dhe në një strukturë komanduese. Garda Revolucionare tha gjithashtu se kishte kryer një sulm ndaj platformave mbështetëse të një aeroplanmbajtëseje amerikane në portin e Duqm në Oman, në atë që e përshkroi si faza e tretë e përgjigjes ndaj veprimeve ushtarake amerikane.
Pretendimet e të dyja palëve mbi dëmet e shkaktuara mbeten ende të paverifikuara.
