Sheikh Hamad bin Khalifa Al Thani, ish-Emiri i Katarit, është ndarë nga jeta në moshën 74-vjeçare. Konfirmimi i lajmit erdhi nga Gjykata e Emirit (Amiri Diwan), institucioni më i lartë qeveritar në vend.
Ai mbetet një prej personaliteteve më përcaktuese në historinë bashkëkohore të Katarit. Sheikh Hamad bin Khalifa Al Thani mori drejtimin e vendit në vitin 1995 dhe qëndroi në pushtet deri në vitin 2013, kur vendosi t’ia kalonte vullnetarisht drejtimin e shtetit djalit të tij, emirit aktual, Sheikh Tamim bin Hamad Al Thani.
Të lidhura
None found
Një hap i tillë është konsideruar i pazakontë për rajonin, ku dorëzimi vullnetar i pushtetit ndodh rrallë.
Gjatë 18 viteve në krye të Katarit, ai e drejtoi vendin drejt një rritjeje të madhe ekonomike, të mbështetur nga shfrytëzimi i rezervave të mëdha të gazit natyror. Paralelisht, Katari forcoi ndjeshëm praninë e tij në skenën ndërkombëtare, duke marrë rol të rëndësishëm në diplomaci, investime dhe media.
Nën udhëheqjen e tij u vendosën edhe bazat e strategjisë “Vizioni Kombëtar i Katarit 2030”, një projekt afatgjatë i fokusuar te diversifikimi i ekonomisë dhe zhvillimi i qëndrueshëm i vendit.
Deri në këto momente, autoritetet e Katarit nuk kanë bërë publike shkaqet e vdekjes së ish-emirit. Po ashtu, ende nuk janë dhënë hollësi për ceremonitë zyrtare të zisë.
