Abbas Araghchi, ministri i Jashtëm i Iranit, deklaroi të shtunën se Teherani e kishte “mbajtur fjalën” në lidhje me armëpushimin me Shtetet e Bashkuara. Reagimi i tij erdhi pasi Donald Trump këmbënguli se armëpushimi kishte përfunduar, megjithëse pranoi vijimin e negociatave me Republikën Islamike.
Të lidhura
None found
Në një postim në X, Araghchi shkroi se “Irani deri më tani e ka mbajtur fjalën e tij, ndryshe nga i ashtuquajturi Sekretar i Thesarit të SHBA-së, i cili po shkel paragrafin 9 të Memorandumit të Mirëkuptimit”, duke iu referuar pjesës së memorandumit që lidhet me mosdislokimin e forcave shtesë amerikane në rajon.
Në të njëjtin reagim në X, kryediplomati iranian theksoi gjithashtu se “nuk mund të ketë respekt nëse nuk është i ndërsjellë”.
Donald Trump deklaroi të premten sërish se armëpushimi kishte “mbaruar”, por njëkohësisht pranoi vazhdimin e bisedimeve me Teheranin.
“Republika Islamike e Iranit na ka kërkuar të vazhdojmë diskutimet”, u shpreh ai. Megjithatë, zëdhënësi i Ministrisë së Jashtme të Iranit sqaroi menjëherë se Teherani “nuk ka bërë asnjë kërkesë të tillë”, teksa njoftoi edhe se Araghchi do të udhëtonte të shtunën drejt Omanit për të diskutuar çështjen e Ngushticës së Hormuzit.
Përplasjet mes Iranit dhe Shteteve të Bashkuara rinisën të martën e kaluar, në atë që konsiderohen më të rëndësishmet që nga marrëveshja e nënshkruar më 17 qershor, e cila kishte si synim gjetjen e një zgjidhjeje përfundimtare për luftën që nisi më 28 shkurt me sulmin izraelito-amerikan kundër Iranit.
Teherani lejon vetëm një korsi detare përgjatë bregdetit të vet dhe përjashton çdo rikthim në gjendjen para luftës, kur lundrimi në këtë Ngushticë ishte i lirë. Normalisht, përmes saj transportohej një e pesta e hidrokarbureve të botës. Shtetet e Bashkuara goditën Iranin për dy net radhazi, pasi akuzuan Teheranin për sulme ndaj tre anijeve tregtare në Ngushticë. Si kundërpërgjigje, Irani qëlloi vendet e Gjirit: Kuvajtin, Bahreinin dhe Katarin.
Sipas zyrtarëve amerikanë, Irani pranoi se “një grup ekstremistësh jashtë kontrollit “u përpoq të minonte negociatat e paqes dhe armëpushimin duke sulmuar anijet tregtare në Ngushticën e Hormuzit, duke provokuar reagimin e SHBA-së.
Ndërkaq, Wall Street Journal shkruan se administrata Trump e konsideron gjithnjë e më pak të mundshme arritjen e një marrëveshjeje bërthamore me Iranin. Gazeta citoi një zyrtar të administratës, sipas të cilit Irani pritet të dalë në orët e ardhshme me një deklaratë publike ku të shpallë se Ngushtica e Hormuzit është e hapur dhe të premtojë se nuk do të qëllojë anijet. Sipas të njëjtit zyrtar, mungesa e një veprimi në këtë drejtim mund të sjellë pasoja serioze. Kjo analizë duket se lë të kuptohet për një ndryshim të mundshëm në strategjinë iraniane.
