Përplasjet mes Shteteve të Bashkuara dhe Iranit janë intensifikuar edhe më tej, pasi të dyja palët kanë shkëmbyer një tjetër valë sulmesh gjatë natës, duke rritur shqetësimet për një përshkallëzim të mëtejshëm të konfliktit në rajon.
Shtetet e Bashkuara ndërmorën sulme të reja ajrore ndaj Iranit, të cilat presidenti amerikan Donald Trump i cilësoi si një “kundërpërgjigje” ndaj bombardimeve të një dite më parë mbi anije tregtare, për të cilat Uashingtoni fajëson Teheranin.
Të lidhura
None found
Komanda Qendrore e SHBA-së (CENTCOM), njoftoi se kishte goditur rreth 90 objektiva iraniane.
Sipas saj, operacioni kishte për qëllim të dobësonte më tej aftësinë e Iranit për të sulmuar anijet tregtare dhe marinarët civilë në Ngushticën e Hormuzit.
Pak orë pas sulmeve, Trump deklaroi para gazetarëve në bordin e avionit presidencial Air Force One se zyrtarë iranianë, kishin kontaktuar me Uashingtonin dhe se, “duan shumë të arrijnë një marrëveshje”.
Megjithatë, ai shtoi se nuk është i sigurt nëse ata janë “të denjë” për një marrëveshje.
Ndërkohë, tensionet janë përhapur edhe në vendet e Gjirit. Bahrejni raportoi shpërthime në kryeqytetin Manama, Kuvajti njoftoi se kishte interceptuar raketa dhe dronë, ndërsa Katari lëshoi një alarm sigurie për situatën në rajon.
Nga ana tjetër, kryetari i Parlamentit iranian dhe negociatori kryesor i vendit me SHBA-në, Mohammad Bagher Ghalibaf, reagoi përmes rrjetit social X, duke deklaruar se, “Amerika ende nuk e ka kuptuar se bullizmi dhe shkelja e premtimeve nuk janë më pa kosto”.
Sulmet e fundit vijnë pasi SHBA-ja kishte njoftuar se të martën goditi më shumë se 80 objektiva në Iran, në përgjigje të sulmeve ndaj anijeve tregtare në Ngushticën e Hormuzit.
