Riho Terras, raportues i Parlamentit Evropian për Kosovën, i ka bërë thirrje kryeministrit në detyrë Albin Kurti që të angazhohet në krijimin e një koalicioni funksional dhe në sigurimin e zgjedhjes së presidentit.
Të lidhura
None found
Në një postim në platformën X, pas takimeve që zhvilloi në Kosovë, Terras shkroi: “E inkurajoj kryeministrin Kurti të tregojë burrështetësi për të ndërtuar një koalicion funksional dhe për të siguruar zgjedhjen e presidentit”.
Ai theksoi më tej se “Kosovës i duhen institucione stabile për të avancuar në rrugën drejt BE-së”.
Gjatë së martës, Terras qëndroi në Kosovë, ku zhvilloi takime me ushtruesen e detyrës së presidentes, Albulena Haxhiu, ministrin në detyrë të Punëve të Jashtme, Glauk Konjufca, kryetarin e Partisë Demokratike të Kosovës, Bedri Hamza, kryetarin e Lidhjes Demokratike të Kosovës, Lumir Abdixhiku, si edhe kryetarin e Aleancës për Ardhmërinë e Kosovës, Ardian Gjini.
Në një tjetër reagim në X, ai bëri të ditur se në këto takime është biseduar për zhvillimet politike në Kosovë dhe për zgjerimin e Bashkimit Evropian, duke nënvizuar se e ardhmja e Kosovës është në BE.
“Këtë mëngjes u takova me Albulena Haxhiun, Glauk Konjufcën dhe Bedri Hamzën. Diskutuam për politikën në Kosovë dhe zgjerimin e Bashkimit Evropian. E ardhmja e Kosovës qëndron në Bashkimin Evropian, por anëtarësimi kërkon reforma. Ne po punojmë për këtë”, ka shkruar Terras.
