Rassemblement National i së djathtës ekstreme ka nisur të pozicionohet për zgjedhjet presidenciale franceze të vitit 2027, teksa ende pritet vendimi i apelit për Marine Le Pen. Ajo përballet me rrezikun që të mbetet jashtë garës, për shkak të një çështjeje që lidhet me keqpërdorimin e fondeve të Bashkimit Europian.
Të lidhura
None found
Në rast se Le Pen nuk autorizohet të marrë pjesë në zgjedhje, Jordan Bardella shihet si emri që do të përfaqësojë RN. Anketimet sugjerojnë se si Le Pen, ashtu edhe Bardella do të dilnin në vend të parë në raundin e parë, çka e bën perspektivën e një fitoreje të RN-së më të afërt se kurrë më parë.
Sipas analistëve, zgjerimi i mbështetjes elektorale për partinë lidhet me përpjekjen e saj për t’u larguar nga perceptimi i dikurshëm si forcë radikale dhe për t’u paraqitur si një alternativë e përgatitur për të qeverisur.
Edhe në raport me politikën e jashtme, RN duket se po rishikon qëndrimin ndaj Gjermanisë. Në dallim nga periudhat e mëparshme, Bardella ka folur me tone vlerësuese për kancelarin Friedrich Merz, duke nënvizuar ekzistencën e një “bazë e përbashkët ideologjike”, sidomos në lidhje me emigracionin dhe kundërshtitë ndaj disa politikave të BE-së për klimën.
Po ashtu, Rassemblement National ka mbajtur distancë nga partia gjermane AfD, të cilën e sheh si tepër radikale. Megjithatë, njohësit e çështjeve politike paralajmërojnë se një triumf i RN-së mund të krijojë përplasje midis Parisit dhe Berlinit, veçanërisht për energjinë, buxhetin e BE-së dhe procesin e integrimit evropian.
Megjithëse këto mospajtime mund të shfaqen, ekspertët nuk parashikojnë që bashkëpunimi franko-gjerman të dëmtohet. Si shembull, ata përmendin qeverinë e Giorgia Melonit në Itali, e cila pas marrjes së pushtetit u shndërrua në një partnere funksionale për vendet e BE-së.
