Donald Trump ka marrë në konsideratë një shkurtim me një të tretën të numrit të trupave amerikane të vendosura në Evropë, si sinjal për vendet aleate të NATO-s, bëjnë të ditur burime që kanë dijeni për diskutimet e zhvilluara në Shtëpinë e Bardhë.
Të lidhura
None found
CNN raporton se kjo ide u paraqit gjatë një takimi të mbajtur këtë pranverë, në të cilin Trump shfaqi pakënaqësi sepse aleatët nuk iu bashkuan fushatës së tij ushtarake kundër Iranit.
Afërsisht në të njëjtën kohë, Pentagoni anuloi dy dislokime të forcave amerikane në Evropë dhe dha urdhër për tërheqjen e një pjese të personelit nga kontinenti.
Sipas raportit, sekretari amerikan i Mbrojtjes, Pete Hegseth, kishte parashikuar që në samitin e NATO-s në qershor të shpallte shkurtime edhe më të thella të pranisë ushtarake amerikane. Por, pas konsultimeve me zyrtarë të lartë të administratës, ai plan u zëvendësua me një rishikim gjashtëmujor të forcave amerikane në Evropë.
Burimet thonë se Trump vijon të mbajë një qëndrim skeptik ndaj NATO-s, duke pretenduar se barra kryesore për mbrojtjen e Evropës bie mbi Shtetet e Bashkuara, ndërsa aleatët nuk japin kontribut të mjaftueshëm.
Presidenti amerikan nuk ka përjashtuar as skenarin e largimit të SHBA-së nga aleanca dhe më herët ka kërcënuar edhe me marrjen e Grenlandës, territor i Danimarkës, një shtet anëtar i NATO-s. Këto qëndrime kanë rritur shqetësimin te aleatët evropianë për të ardhmen e angazhimit amerikan në sigurinë e kontinentit.
