Mbrëmjen e së hënës, Principata e Monakos u trondit nga një shpërthim i fortë që la tre persona të lënduar dhe vuri në alarm autoritetet, të cilat po e trajtojnë ngjarjen si një sulm të mundshëm terrorist.
Mediat franceze raportojnë se në shënjestër të mundshme kanë qenë biznesmeni ukrainas Vadim Ermolaev, bashkë me gruan dhe djalin e tij.
Të lidhura
None found
Bomba shpërtheu jashtë hyrjes së një prone luksoze në Monako dhe, sipas të dhënave, objektivi më i mundshëm ka qenë pikërisht Vadim Ermolaev, oligarku me origjinë nga Ukraina, i cili mbeti i plagosur rëndë.
I lindur në Dnipro, Ermolaev hoqi dorë nga shtetësia ukrainase në vitin 2019 për t’u pajisur me pasaportë qipriote. Ai është baba i katër fëmijëve dhe njëri prej tyre, një 13-vjeçar, ndodhej me të në momentin e sulmit, duke mbetur gjithashtu i plagosur, por më lehtë.
Një pjesë të madhe të pasurisë së tij ai e ndërtoi përmes prodhimit të alkoolit. Para nisjes së luftës në Ukrainë, “Forbes” e vlerësoi pasurinë e tij neto në 220 milionë dollarë, duke e renditur në vendin e 23-të mes 100 personave më të pasur në Ukrainë.
Ermolaev drejton kompaninë agro-ushqimore “Alef” dhe njëkohësisht është bashkëpronar i kompanisë financiare estoneze “Versobank”, e cila në vitin 2018 u pezullua nga Banka Qendrore Evropiane për “shkelje sistematike të rregullave kundër pastrimit të parave”.
Kur vendosi të heqë dorë nga shtetësia ukrainase për të marrë atë qipriote, ai u shpreh: “Dua të përfitoj nga mbrojtja ndërkombëtare. Sistemi gjyqësor ukrainas, për ta thënë butë, është larg të qenit i përsosur dhe administrata tatimore është e anshme”. Pavarësisht kësaj, ai vijoi aktivitetin e biznesit në Ukrainë dhe në vitin 2021, përmes kompanisë së tij “Alef”, rifilloi ndërtimin e një kompleksi pasurish të patundshme në Dnipro. Po në atë vit, ai inauguroi termocentralin më të madh të biomasës në vend.
Në vitin 2025, ai shkroi në Instagram: “Nuk duhet të kënaqemi me kthimin e Dnipro-s siç ishte më parë. Pas kësaj lufte, Ukraina është ndryshe dhe Dnipro duhet të bëhet simbol i qëndrueshmërisë, zhvillimit teknologjik dhe një qasjeje të re ndaj planifikimit urban”.
Nga viti 2023, Këshilli i Sigurisë dhe Mbrojtjes Kombëtare i Ukrainës e ka futur atë në listën e sanksioneve për një periudhë 10-vjeçare, për shkak të bashkëpunimit me Rusinë. Miliarderi përballet me akuza se ka vazhduar aktivitetet e tregtisë së alkoolit në Krimenë e pushtuar nga Rusia.
Ermolaev njihet si frekuentues i rregullt i kazinove dhe lëviz me makinën e tij Bentley. Ai ka në pronësi një jaht të madh, si edhe një vilë pranë Saint-Jean-Cap-Ferrat. Sipas inteligjencës ukrainase, ai bën pjesë në “batalionin e Monakos”, grupin e miliarderëve që u zhvendosën në principatë pas shpërthimit të luftës.
