Norvegjia prej vitesh kryeson në Evropë sa i takon shitjeve të automjeteve të reja elektrike, duke arritur një pjesëmarrje mbresëlënëse prej 98.3 për qind të tregut. Tani, në këtë ritëm po afrohet edhe Danimarka.
Në tregun danez, modelet elektrike po shënojnë rritje të shpejtë. Muajin e kaluar madje u vendos një rekord i ri në shitjet e makinave të reja për blerësit privatë.
Të lidhura
None found
Të dhënat e Bilstatistika, të cituara nga Mobility Denmark, tregojnë se në prill, deri në 96.3 për qind e automjeteve të reja të regjistruara nga individë privatë në Danimarkë ishin plotësisht elektrike.
Megjithëse qytetarët që kanë mundësi të blejnë një makinë të re po orientohen masivisht drejt automjeteve elektrike, bizneset në Danimarkë vazhdojnë të mbeten pas në këtë drejtim.
Për pasojë, pesha e përgjithshme e makinave elektrike në shitjet totale të automjeteve të reja arriti në 81.9 për qind, pasi sektori i biznesit ende regjistron një numër të madh veturash me motorë me djegie të brendshme.
Rritja e shpejtë e interesimit për automjetet elektrike dhe popullariteti i tyre i lartë lidhen pjesërisht me çmimet e larta të karburantit. Në Danimarkë, ndikim të veçantë kanë edhe taksat e larta për makinat që emetojnë CO2.
Sa u përket modeleve më të kërkuara gjatë muajit të kaluar në Danimarkë, në krye ishin Skoda Elroq dhe Enyaq me 1,088 dhe 823 njësi të shitura. Pas tyre renditen Toyota C-HR+ me 804, Volkswagen ID.4 me 680 dhe Audi Q4 e-tron me 444.
