Presidentja e Komisionit Evropian, Ursula von der Leyen, ka zhvilluar një bisedë telefonike me presidentin e Turqisë, Recep Tayyip Erdoğan, duke e bërë të ditur vetë përmes një postimi në platformën “X”.
Von der Leyen e cilësoi Turqinë si një “partner kyç në një rajon që ndodhet në trazira”, ndërsa theksoi se Bashkimi Evropian vlerëson rolin e Ankarasë në mbështetjen e de-përshkallëzimit dhe zgjidhjes diplomatike të konfliktit me Iranin.
Të lidhura
None found
Sipas saj, gjatë bisedës u diskutuan edhe çështje të rëndësishme si situata në Mesdheun Lindor dhe çështja e Qipros, si dhe rëndësia e marrëdhënieve mes BE-së dhe Turqisë.
“Interesat tona përputhen: ruajtja e rrugëve të hapura tregtare, rrjedha e energjisë dhe stabiliteti i zinxhirëve të furnizimit. Ne do të vazhdojmë të bashkëpunojmë ngushtë në këto prioritete”, ka shkruar von der Leyen.
Ajo shtoi se BE vlerëson përpjekjet e Turqisë për uljen e tensioneve dhe zgjidhjen diplomatike të konfliktit me Iranin, ndërsa theksoi se Brukseli është i gatshëm të mbështesë procesin nën kujdesin e Kombeve të Bashkuara në të gjitha fazat.
