Kryeministri Edi Rama tha sot gjatë fjalës së tij të çeljes së Vitit Akademik 2025-2026 të Kolegjit të Europës në Tiranë, se Një Europë e ndarë është më lehtë për t’u përçarë dhe e bashkuar ajo bëhet e pamposhtur.
Ai këmbënguli në diskursin e tij se Shqipëria dhe Ballkani perëndimor i sjellin paqe dhe bashkim Unionit, pasi nuk është thjesht një proces në letër, por edhe një filozofi historike, pavarësisht nëse vendet do e kenë veton apo votën.
Teksa e quajti një realitet europian në Tiranë, e pamendueshme deri pak vite më parë, ai falënderoi vendet e BE-së dhe ambasadorët për durimin e sprovuar në vitet e kaluara, ku procesi me negociatat pati edhe kundërshti. Ai tha se i kupton edhe disa vende aktualisht që ngrenë pyetjen se si do të jetë BE-ja me më shumë se 27 vende, kur edhe aktualisht nuk merren dot vesh brenda tyre.
“Ribashkimi zgjeron paqen. Në historinë e zgjerimit të BE-së, çdo zgjerim nuk ka zgjeruar veten, por paqen. Në shumë lufta e përplasje me njëra-tjetrën, ribashkimi flet për bashkimin e Evropës. Selanik 2023 ishte një angazhim, ribashkimi sjell energji e mundësi të reja. Kështu ka ndodhur me valët e para të zgjerimit dhe kështu do të jetë edhe me ribashkimin e Ballkanit perëndimor me BE-në. Sepse asnjë vend që bëhet anëtar nuk është anëtar pa shfrytëzuar të gjitha energjitë. Ribashkimi mbron Evropën nga vetja. Një Evropë e ndarë është e lehtë për t’u përçarë dhe një Evropë e bashkuar është e vështirë për t’u mposhtur. Këto janë të ilustruara me më shumë fakte”, tha kryeministri mes të tjerash para të pranishmëve, përfshi edhe të gjithë trupën diplomatike të ambasadorëve në Tiranë.
