Stuhia Benjamin përfshiu Evropën Perëndimore të enjten (23/10), duke lënë pas përmbytje dhe shkatërrime nga bregu i Anglisë jugore deri në Korsikë, me erëra që tejkalonin 100 kilometra në orë dhe shira të pandërprerë.
Ajo shkaktoi ndërprerje të energjisë elektrike, rrëzim pemësh dhe probleme të rënda të udhëtimit, duke i detyruar autoritetet të ishin në gatishmëri të plotë. Në Mbretërinë e Bashkuar, juglindja u godit më rëndë. Në Sheerness, një qendër argëtimi u detyrua të mbyllej pasi një pemë ra mbi ndërtesë, ndërsa paralajmërime për përmbytje u lëshuan për pjesë të tëra të Kentit, Surrey-t dhe Sussex-it .
Disa lumenj dolën nga shtrati, duke shkaktuar përmbytje të gjera. Moti i keq gjithashtu ndërpreu transportin, me kompaninë e trageteve DFDS që njoftoi vonesa dhe anulime të linjave për në Francë, ndërsa pemët e rrëzuara bllokuan rrugët dhe linjat hekurudhore. Erërat e forta arritën në 90 kilometra në orë përgjatë bregdetit, me autoritetet që i paralajmëruan shoferët të shmangin rrugët e përmbytura.
Në Francë, shërbimi meteorologjik lëshoi paralajmërime portokalli për gjashtë rajone, pasi erërat arritën shpejtësinë 130 km/orë. Zonat bregdetare si Bretanjë dhe Normandi u përballën me valë të forta, ndërsa ura Pont de Saint-Nazaire dhe parqet në Nantes u mbyllën si masë paraprake. Edhe pse rajoni i Parisit nuk u prek veçanërisht, autoritetet u bënë thirrje banorëve të shmangin udhëtimet për shkak të rrezikut të rrëzimit të pemëve dhe objekteve. Sipas ministrit francez të Ekonomisë, Roland Leskier, rreth 60,000 familje mbetën pa energji elektrike në të gjithë vendin.
Korsika ishte incidenti më tragjik i stuhisë. Një burrë 45-vjeçar gjerman humbi jetën kur u rrëmbye nga një përrua ndërsa notonte në një lumë me familjen e tij. Gruaja dhe dy vajzat e tij, të moshës 9 dhe 13 vjeç, u shpëtuan. Erëra deri në 130 km/orë frynin në ishull, ndërsa lidhjet ajrore dhe të trageteve u ndërprenë për shkak të kushteve ekstreme.
Vala e motit të keq nuk u kufizua vetëm në Mbretërinë e Bashkuar dhe Francë. Belgjika dhe Holanda gjithashtu përjetuan reshje të dendura shiu dhe përmbytje në disa vende, me dëmtime në infrastrukturë dhe vonesa në fluturime dhe lidhje hekurudhore. Ndërsa stuhia filloi të lëvizte drejt lindjes, fenomeni u dobësua.
