Organizata e Veteranëve të Luftës së Ushtrisë Çlirimtare të Kosovës ka ngritur zërin për ngecjet në procesin e plotësim-ndryshimeve të Ligjit për Dhomat e Specializuara, duke paralajmëruar se në rast se ky proces nuk përmbyllet shpejt, do të organizohen protesta masive në mbarë vendin.
Përmes një komunikate për shtyp, kjo organizatë i bën apel shumicës qeverisëse dhe gjithë forcave politike që të kapërcejnë interesat partiake dhe ta çojnë deri në fund këtë çështje pa vonesa të mëtejshme.
Të lidhura
None found
“Nuk mund të tolerohet që një temë me këtë peshë të mbetet peng i konflikteve politike apo ndikimeve nga faktori ndërkombëtar. Ekzekutivi dhe shumica në parlament duhet ta kuptojnë se kanë detyrim të lëvizin dhe të mos lejojnë që ngërçet të bllokojnë finalizimin e këtij procesi”, thuhet në deklaratë.
OVL e UÇK-së thekson gjithashtu se është e palejueshme dhe e padrejtë që një temë kaq delikate të përdoret për të thelluar ndarjet politike apo për të nxitur përplasje ndërmjet partive.
Kjo organizatë kërkon që amendamentet e Ligjit për Dhomat e Specializuara të kalojnë me procedurë urgjente, në kohën më të shkurtër që e lejojnë rregullat parlamentare dhe mekanizmat institucionalë.
Rikujtojmë se sot ishte parashikuar votimi i Ligjit për Dhomat e Specializuara, por seanca plenare e Kuvendit të Kosovës u shty pa një datë të re. Kryeministri Albin Kurti njoftoi më herët se po përgatitet një projektligj i ri për Dhomat e Specializuara, ndërsa drafti fillestar pritet të jetë gati brenda javës së ardhshme.
Kurti bëri të ditur se grupi i punës i ngarkuar me strategjinë shtetërore për ish-udhëheqësit e UÇK-së do të dorëzojë së shpejti propozimin për legjislacionin e ri.
Gjatë fjalës së tij në seancën plenare, kryeministri theksoi se në këtë grup pune marrin pjesë institucionet kyçe dhe partitë parlamentare, ndërsa në përgatitjen e dokumenteve janë përfshirë edhe specialistë të fushës juridike.
Ai vuri në dukje se teksti i ligjit të ri duhet hartuar me kujdes, në harmoni me Kushtetutën dhe kuadrin ligjor të Kosovës, përpara se të dërgohet për shqyrtim dhe miratim. Po ashtu, Kurti shtoi se qëndrimi i tij ndaj Gjykatës Speciale ka mbetur i pandryshuar që nga pranvera e vitit 2015.








