Nënkryetarja e Kuvendit të Kosovës nga Partia Demokratike e Kosovës, Vlora Çitaku, i ka kërkuar kryeministrit dhe liderit të Lëvizjes Vetëvendosje, Albin Kurti, të marrë pjesë në seancë për të votuar ndryshimet e Ligjit për Dhomat e Specializuara.
Të lidhura
None found
“Albin, eja në Kuvend. Eja dhe ta votojmë ligjin”, shkroi Çitaku në një postim në Facebook.
Ajo i bëri thirrje Kurtit të shmangë nxitjen e tensioneve, ndërsa e akuzoi se po udhëzon Policinë që të përdorë dhunë ndaj protestuesve.
Megjithatë, Çitaku nuk paraqiti dëshmi për pretendimin se Kurti ka urdhëruar Policinë të ndërhyjë ndaj protestuesve.
“Sot nuk na duhen përplasje. Nuk na duhen tensione. Nuk na duhet dhunë. Na duhet përgjegjësi. Na duhet qetësi. Na duhet guxim politik”, deklaroi ajo.
Sipas Çitakut, Kurti e ka detyrim të jetë në Kuvend, të dëgjojë qytetarët dhe të votojë. Ajo e lidhi miratimin e ndryshimeve ligjore me mbrojtjen e UÇK-së dhe të personave që luftuan në radhët e saj. / REL
