Organizata e Veteranëve të Luftës së UÇK-së ka reaguar lidhur me situatën e krijuar gjatë protestës në Prishtinë, duke i kërkuar Policisë së Kosovës të ndalë atë që e konsideron dhunë të tepruar dhe të paprovokuar.
Të lidhura
None found
Përmes një reagimi të publikuar gjatë protestës, organizata u ka bërë thirrje zyrtarëve policorë të mos përdorin forcë ndaj fëmijëve të dëshmorëve, invalidëve, veteranëve dhe qytetarëve.
“Polici, e dimë që jeni me urdhër dhe se po zbatoni urdhra. Por mbani duart larg fëmijëve të dëshmorëve, invalidëve, veteranëve dhe qytetarëve të këtij vendi”, thuhet në reagimin e OVL-UÇK-së.
Organizata ka kërkuar ndërprerjen e asaj që e cilëson si “dhunë të tepruar dhe të paprovokuar”, duke sqaruar se protesta, sipas saj, nuk është e drejtuar kundër pjesëtarëve të Policisë.
“Ne nuk kemi punë me ju. Kemi punë me përfaqësuesit e popullit dhe kërkojmë që ata të mbajnë përgjegjësi për veprimet e tyre”, vijon reagimi.
OVL-UÇK ka apeluar gjithashtu që uniforma e Policisë të mos përdoret, siç pretendohet në reagim, si instrument dhune ndaj qytetarëve.
Ky reagim u bë publik në një situatë të tensionuar pranë institucioneve shtetërore në Prishtinë, ku protesta është shoqëruar me ndërhyrje të Policisë së Kosovës.
