Ish-gjyqtari i Gjykatës Kushtetuese, Kadri Kryeziu, deklaroi se zgjedhja e presidentit të ri duhet të përfundojë jo më vonë se 6 tetori. Në të kundërtën, sipas tij, vendi do të drejtohet drejt zgjedhjeve të jashtëzakonshme.
Të lidhura
None found
“Afati është deri më 6 tetor. Nëse zbatohet aktgjykimi i Gjykatës Kushtetuese, Parlamenti shpërndahet përmes një dekreti të ushtrueses së detyrës së presidentes. Më pas, me një dekret tjetër, shpallen zgjedhjet e jashtëzakonshme, të cilat duhet të zhvillohen brenda 45 ditësh”, tha Kryeziu për Front Online.
Aktgjykimi i plotë i Gjykatës Kushtetuese u publikua më 29 shtator. Në të, Gjykata vlerësoi se Kuvendi është konstituuar dhe se zgjedhja e Qeverisë “Kurti 4” është në pajtim me Kushtetutën.
Dokumenti përcaktoi gjithashtu 6 tetorin si datën përfundimtare deri kur duhet të zgjidhet presidenti i Kosovës.
Gjykata sqaroi se Kryesia e Kuvendit mund të vazhdojë punën edhe pa një nënkryetar në rrethana të caktuara, për sa kohë ekziston kuorumi. Megjithatë, ajo kërkoi që nënkryetari nga PDK-ja të votohet sa më shpejt.
Nëse presidenti nuk zgjidhet deri më 6 tetor, aktgjykimi parashikon që zgjedhjet të mbahen brenda 45 ditësh.
