Kryeministri në detyrë i Kosovës, Albin Kurti, njoftoi se e ka nisur ditën me një takim me homologun kroat, Andrej Plenkoviq. Në qendër të bisedimeve ishte forcimi i bashkëpunimit mes Kosovës dhe Kroacisë në siguri, mbrojtje, ekonomi dhe tregti.
Përmes një postimi në Facebook, Kurti e përshkroi Kroacinë si shtet partner të Republikës së Kosovës dhe popullin kroat si popull mik.
Të lidhura
None found
Ai theksoi se, krahas bashkëpunimit tashmë të mirë në fushën e sigurisë dhe mbrojtjes, të dyja vendet synojnë të zgjerojnë më tej marrëdhëniet ekonomike dhe tregtare.
Kurti tha se Kosova regjistroi rritje ekonomike prej 5.4% në tremujorin e parë dhe 4.1% në tremujorin e dytë të këtij viti. Sipas tij, ekonomia e vendit pritet të kalojë këtë vit shifrën e 12 miliardë eurove, ndërsa në vitin e parë të qeverisjes së tij ishte 7 miliardë euro.
Kryeministri në detyrë shtoi se, përveç rritjes së qëndrueshme ekonomike, gjatë kësaj periudhe është forcuar sundimi i ligjit dhe është shënuar progres demokratik.
Kurti deklaroi gjithashtu se vendimi i Dhomave të Specializuara është i pasaktë, i padrejtë dhe i rëndë. Ai e lidhi këtë qëndrim me historinë e përbashkët të Kosovës dhe Kroacisë, të cilat, sipas tij, kanë luftuar për çlirim dhe pavarësi kundër të njëjtit regjim, atij të Millosheviqit.
Ai theksoi se është e qartë se kush ka kryer krime gjatë katër luftërave në ish-Jugosllavi dhe se lufta e popullit të Kosovës ishte e drejtë, e pastër dhe çlirimtare përballë regjimit gjenocidal të Serbisë.
Sipas Kurtit, Serbia vijon të mohojë dhe të fshehë krimet e kryera në Kosovë, ndërsa arkivat e saj mbeten të mbyllura dhe të klasifikuara. Hapja e tyre, nënvizoi ai, është e domosdoshme për zbardhjen e fatit të personave të zhdukur me dhunë gjatë luftës, si dhe për vendosjen e së vërtetës dhe drejtësisë.
Kurti akuzoi gjithashtu Serbinë se po vijon në mënyrë sistematike spastrimin etnik administrativ ndaj komunitetit shqiptar në Luginën e Preshevës, përmes pasivizimit të adresave dhe përjashtimit nga institucionet.
Në takim, ai vlerësoi rritjen e bashkëpunimit ushtarak me Kroacinë edhe në sektorin e mbrojtjes. Kurti theksoi rëndësinë e anëtarësimit të Kosovës në Kartën e Adriatikut dhe falënderoi Kroacinë për mbështetjen e vazhdueshme e të palëkundur në procesin e integrimit evropian dhe euroatlantik, si dhe në përballimin e sfidave të përbashkëta të sigurisë në rajon.
