Kryetari i Aleancës, Ardian Gjini, priti në një takim delegacionin e lartë shtetëror dhe diplomatik nga Franca.
Të lidhura
None found
Gjatë takimit, Gjini i uroi mirëseardhjen ambasadorit të sapoemëruar francez në Kosovë, Sh.T. Jean-François Huchet, në misionin e tij të ri.
Në bisedën me delegacionin francez, ku morën pjesë edhe senatorët e Senatit Francez Marta de Cidrac, Laurence Harribey, Alain Milon dhe Arnaud Bazin, të kryesuar nga Marta de Cidrac, Gjini theksoi rëndësinë e bashkëpunimit dhe koordinimit me aleatët strategjikë të Kosovës.
Ai vlerësoi se, përballë sfidave aktuale dhe proceseve historike nëpër të cilat po kalon populli ynë, partneriteti me aleatët është i domosdoshëm.
Palët diskutuan gjerësisht për mbështetjen që Franca mund t’i japë Kosovës në proceset integruese, veçanërisht për anëtarësimin në Këshillin e Evropës, si dhe për vizionin e Aleancës për një shtet të zhvilluar dhe plotësisht të integruar në familjen evropiane.
Gjini nënvizoi se Kosova ka nevojë për përkrahjen e Francës, të cilën e konsideroi partner të fuqishëm dhe të pazëvendësueshëm në rrugëtimin shtetndërtues të vendit.
