Kryetari i OVL-UÇK-së, Hysni Gucati, deklaroi se organizata do të përkrahë çdo protestë popullore, për sa kohë ajo zhvillohet në mënyrë paqësore.
Të lidhura
None found
Sipas tij, mbështetja do të përfshijë edhe protestën e studentëve, ndërsa mundësia që vetë OVL-UÇK të organizojë protesta do të shqyrtohet në mbledhjen e kryesisë.
“Organizata e veteranëve do të jetë gjithmonë në krah të çdo nisme për protestë popullore”, u shpreh Gucati, duke theksuar se protestat nuk duhet të shoqërohen me dhunë.
Studentët kërkojnë lirimin e ish-krerëve të UÇK-së dhe insistojnë se asnjë vendim nuk ndryshon mënyrën se si i shohin çlirimtarët e tyre.
Gucati shtoi se OVL-UÇK do të vijojë t’i mbështesë protestat deri në realizimin e qëllimeve të tyre.
Ai foli gjithashtu për Projektligjin e PDK-së, i cili parashikon ndryshimin dhe plotësimin e Ligjit për Dhomat e Specializuara. Nismën e konsideroi një hap pozitiv, por sqaroi se qëndrimi i OVL-UÇK-së shkon përtej këtij propozimi.
“Është mirë që kanë dorëzuar, më mirë vonë se kurrë”, tha ai.
Megjithatë, kryetari i OVL-UÇK-së kërkoi bashkimin e partive politike për të kërkuar shfuqizimin e plotë të Gjykatës Speciale.
Gucati bëri të ditur se organizata i ka dorëzuar tashmë pesë pikat e saj për këtë çështje dhe pret që deputetët t’i mbështesin nismat për ndryshimin e situatës aktuale.
