Lucia Sisic, e cila fitoi titullin Miss Austria në vitin 2024, u nda nga jeta në moshë fare të re, 22 vjeç.
Të lidhura
None found
Që nga lindja, e reja austriake luftoi me një sëmundje kongjenitale të zemrës dhe gjatë jetës së saj iu desh të përballej me shtatë procedura kirurgjikale, raporton BBC.
Njoftimi i hidhur erdhi nga Mission Austria, enti përgjegjës për organizimin e garave Miss dhe Mister Austria, nëpërmjet një komunikate në platformat sociale.
“Me tronditje të thellë dhe dhimbje të madhe morëm lajmin për ndarjen nga jeta të Miss Austria 2024, Lucia Sisic”, shprehej mesazhi i shpërndarë nga organizatorët.
Ajo u shpall fituese në vitin 2024 dhe vijonte të mbante ende kurorën, pasi ende nuk është organizuar një event i ri për të zgjedhur trashëgimtaren e saj.
Në reagimin e saj, Mission Austria e cilësoi 22-vjeçaren si “një vajzë të re të mahnitshme” dhe i përcolli ngushëllime familjes, rrethit shoqëror dhe të gjithë njerëzve që e donin.
“Lucia do të jetë përherë pjesë e familjes sonë Miss Austria”, lexohej në deklaratën e firmosur nga drejtuesja Kerstin Rigger dhe bashkëshorti i saj, Jörg.
Vetë Lucia nuk e kishte mbajtur kurrë të fshehtë sfidën e saj të gjatë shëndetësore. Në vitin 2024, ajo ndau në Instagram një mesazh mirënjohjeje për stafin mjekësor pediatrik që e kishte ndjekur gjatë viteve të fëmijërisë.
Ajo rrëfeu se falë përkushtimit të mjekëve dhe personelit shëndetësor, të cilët sipas saj ia shpëtuan jetën në disa rrethana, arriti të kapërcente periudhat më të errëta dhe të shijonte një ekzistencë të plotë.
Gjatë një bashkëbisedimi me median austriake Heute po atë vit, Sisic zbuloi se operacioni i parë iu krye menjëherë sapo erdhi në jetë.
Sfidat fizike lanë gjurmë edhe në vitet e para të saj. Ajo tregoi se nuk lejohej të merrte pjesë në disa disiplina sportive dhe se përvoja e saj e fëmijërisë ishte krejt e ndryshme nga ajo e moshatarëve.
“Thjesht fëmijëria ime ishte tjetër, por kjo më dha një forcë të jashtëzakonshme”, kishte pohuar ajo.
