Zijadin Sela ka reaguar ndaj deklaratës së Bilall Kasamit, i cili la të hapur mundësinë që Sela të përfshihet në qeveri, por jo në koalicionin VLEN.
Të lidhura
None found
Kasami tha se kabineti qeveritar mund të zgjerohet dhe se diskutimet janë të mundshme me të gjithë ata që pajtohen me programin e qeverisë.
“Nuk besoj që ka bisedime në drejtim të përfshirjes në VLEN, por që ka biseda në drejtim të përfshirjes në qeveri, ka biseda. Pra, qeveria mund të zgjerohet, por për momentin zotëri Sela, nuk jemi në bisedime me zotëri Selën për të qenë pjesë e VLEN-it. Për pjesë të qeverisë bisedojmë me të gjithë ata të cilët pranojnë programin e qeverisë dhe janë të gatshëm që të jenë pjesë e saj”, deklaroi Kasami.
Por nga Lidhja Shqiptare e Ziadin Selës, në një prononcim për TV21, shprehen se nuk e konsiderojnë veten pjesë të një pushteti që, sipas tyre, i vendos të drejtat e shqiptarëve në funksion të pazareve politike.
“Lidhja Shqiptare nuk e sheh veten pjesë të një konglomerati mbetjesh të llojllojshme që tregtojnë të drejtat e shqiptarëve në shkëmbim të pushtetit”, thuhet në reagimin e kësaj partie.
Spekulimet për një afrim të mundshëm të Selës me pushtetin nisën pas takimit që ai zhvilloi javë më parë me kryeministrin e Kosovës, Albin Kurti.
