Rodri nuk e fshehu zhgënjimin pas barazimit 0-0 të Spanjës kundër Kepit të Gjelbër në ndeshjen e parë të Kupës së Botës, teksa vuri në shënjestër mënyrën si u paraqit kundërshtari në aspektin taktik.
Para sfidës së grupit H, Spanja shihej si favorite e padiskutueshme, edhe për shkak të diferencës prej 65 vendesh mes dy përfaqësueseve në renditjen e FIFA-s. Sidoqoftë, debutuesit e Kepit të Gjelbër morën një pikë historike falë disiplinës dhe organizimit shumë të mirë në mbrojtje.
Të lidhura
None found
Rasti më i mirë për “La Rojan” u regjistrua nga Ferran Torres, që goditi traversën, ndërsa Vozinha, portieri 40-vjeçar, bëri disa ndërhyrje vendimtare dhe e mbajti të paprekur portën e tij.
Në pjesën e dytë, përzgjedhësi Luis de la Fuente hodhi në fushë edhe Lamine Yamal me synimin për të gjetur golin e fitores, por skuadra afrikane qëndroi e fortë deri në fund dhe siguroi një prej rezultateve më të rëndësishme në historinë e futbollit të vendit.
Pas përfundimit të takimit, Rodri e pranoi se Spanja e pati të vështirë të gjente zgjidhje përballë murit mbrojtës të kundërshtarit.
“Nuk ishte e shkruar të ndodhte. Nuk kemi shumë për çfarë të ankohemi”.
“E dinim se ishte një ndeshje që kërkonte durim. Ata u tërhoqën mbrapa dhe mbroheshin shumë shpejt. Ne krijuam raste, por nuk arritëm t’i konkretizonim”.
“Ana pozitive është se ata pothuajse nuk krijuan asgjë kundër nesh. Duhet të përmirësojmë finalizimin”, deklaroi mesfushori i Manchester Cityt.
Kapiteni i Spanjës foli edhe për stilin e lojës së Kepit të Gjelbër, duke nënvizuar se kundërshtari ishte i përqendruar pothuajse vetëm te mbrojtja.
“Kështu luajnë ata. Nuk e kalojnë mesfushën. Është çështje e përmirësimit të finalizimit”, shtoi Rodri.
Pas këtij barazimi surprizues, Spanja do të synojë reagimin në ndeshjet e ardhshme të grupit, ndërsa Kepi i Gjelbër ka marrë shumë vetëbesim pas kësaj pike historike ndaj një prej skuadrave favorite të turneut./
