Michael Yormark, president i Roc Nation, kompanisë që menaxhon interesat e Vinicius Junior, ka ushqyer edhe më shumë zërat për të ardhmen e sulmuesit të Real Madridit.
Të lidhura
None found
Ai ndau një moment nga mbërritja në aeroportin Heathrow dhe e shoqëroi me mesazhin: “Londër, ja ku po vij. Le të shkojmë!”. Postimi u bë në një periudhë kur raportimet për interesimin e Arsenalit ndaj futbollistit brazilian vazhdojnë të jenë të pranishme.
Sipas gazetës spanjolle AS, Mikel Arteta është seriozisht i interesuar për ta transferuar Viniciusin në ekipin londinez.
Raportohet gjithashtu se trajneri i Arsenalit i ka premtuar brazilianit një rol të rëndësishëm dhe qendror në skuadër nëse ai do të kalonte në “Emirates”. Për këtë arsye, vizita e papritur e përfaqësuesit të tij në kryeqytetin britanik ka marrë vëmendje të veçantë.
Vinicius, i cili është 26 vjeç, u rikthye të hënën në stërvitjet e Real Madridit pas pushimeve të marra për shkak të angazhimeve në Kupën e Botës.
Pavarësisht kësaj, vazhdimi i karrierës së tij në “Santiago Bernabeu” mbetet ende i pasigurt.
Marrëveshja e tij aktuale me Real Madridin përfundon në qershor të vitit 2027, ndërsa rinovimi nuk është finalizuar ende, edhe pse negociatat mes palëve kanë vijuar gjatë muajve të fundit.
Kjo situatë e vështirëson pozicionin e klubit spanjoll, i cili mund të jetë i detyruar ta nxjerrë lojtarin në shitje gjatë kësaj vere për të shmangur rrezikun që ta humbasë pas një viti pa përfituar financiarisht.
Afati kalimtar i verës do të mbyllet pas më pak se një muaji.
Ndërkohë, Vinicius ka filluar të integrohet në skemën e trajnerit të ri Jose Mourinho, por e ardhmja e tij kërkon një vendim të shpejtë gjatë ditëve në vijim.
