Prania e Hakan Sukur në tribunat e stadiumit SoFi në Los Angeles tërhoqi vëmendje të madhe, teksa ish-sulmuesi legjendar turk e ndoqi nga afër përballjen e Kupës së Botës mes Turqisë dhe Shteteve të Bashkuara të Amerikës.
Pas ndeshjes, Sukur bëri të ditur në rrjetet sociale se ishte përballur me probleme të pazakonta gjatë përpjekjeve për të transmetuar drejtpërdrejt nga stadiumi.
Të lidhura
None found
Sipas tij, ai nuk arriti të hapte një transmetim “live” në Instagram dhe YouTube, edhe pse interneti punonte normalisht dhe personat përreth tij po i përdornin të njëjtat platforma pa asnjë pengesë.
“Kontrollova gjithçka. Njerëzit përreth meje po transmetonin drejtpërdrejt normalisht, por unë nuk munda nga asnjëri prej dy profileve të mia. I dhashë qasje një miku në Evropë dhe ai e filloi transmetimin pa probleme, por kur u përpoqa përsëri nga SHBA-ja, nuk funksionoi përsëri”, ka thënë Sukur.
Ai shtoi se dyshonte për një kufizim të lidhur me vendndodhjen e tij dhe la të kuptohej se, pikërisht për shkak se ndodhej në stadium, atij iu bllokua mundësia për të transmetuar përmbajtje live. Për këtë pretendim ai nuk paraqiti prova, ndërsa as rrjetet sociale dhe as organizatorët e turneut nuk dhanë ndonjë njoftim.
Ish-kapiteni i Turqisë dhe golashënuesi më i mirë në historinë e përfaqësueses turke ishte i ftuar nga FIFA, ndërsa mbërritja e tij në stadium shkaktoi reagime të shumta, sidomos në Turqi, ku prej vitesh ai është përfshirë në polemika politike dhe ligjore.
Sukur jeton aktualisht në Shtetet e Bashkuara, pasi u largua nga Turqia pas përpjekjes së dështuar për grusht shteti në vitin 2016. Autoritetet turke e hetojnë për lidhje të dyshuara me lëvizjen FETO, akuza që ai i mohon.
Ndonëse Turqia triumfoi ndaj SHBA-së me rezultatin 3-2 në një ndeshje dramatike, ky sukses nuk i mjaftoi për të siguruar kalimin në fazën eliminatore të Kupës së Botës.
Ish-sulmuesi i Galatasarayt dhe Interit konsiderohet një nga futbollistët më të suksesshëm në historinë e futbollit turk. Ai ishte ndër figurat kyçe të kombëtares që e mbylli Kupën e Botës të vitit 2002 në vendin e tretë, ndërsa sot mban rekordin për më së shumti paraqitje me ekipin kombëtar, 112, si dhe për më së shumti gola të shënuar, 58.
Pavarësisht polemikave që e kanë shoqëruar në vitet e fundit, Sukur vazhdon të mbetet një nga emrat më të mëdhenj të futbollit turk. Krahas rekordeve me kombëtaren, ai mban edhe rekordin për golin më të shpejtë në historinë e Kupës së Botës, të realizuar pas vetëm 11 sekondash në ndeshjen për vendin e tretë ndaj Koresë së Jugut në vitin 2002.
