Skuadra e Vorës ndodhet në mes të përgatitjeve parasezonale, duke pritur startin e edicionit të ri të “Abissnet Superiore”. Për ta, ky shënon vitin e dytë rresht në kategorinë më të lartë të futbollit shqiptar, pasi siguruan me sukses qëndrimin, një betejë që vazhdoi deri në xhiron përmbyllëse të kampionatit të fundit.
Të lidhura
None found
Radhët e vorakëve kanë pësuar shumë lëvizje, me lojtarë që janë larguar, të tjerë që janë afruar dhe disa që kanë vijuar bashkëpunimin. Megjithatë, synimet janë më ambicioze krahasuar me sezonin që lamë pas, duke mos u kufizuar thjesht në përsëritjen e objektivit minimal.
Për portalin “Newsport.al”, gardiani i këtij ekipi, Shkëlzen Ruçi, ka ndarë përshtypjet nga viti i parë në elitë, ecurinë e grumbullimit në Bansko të Bullgarisë, transformimet në përbërjen e skuadrës dhe qëllimet e reja për sezonin që po vjen.
Përfunduat një vit të parë plot sfida në Superiore, por arritët ta mbanit Vorën në elitë. Si e keni jetuar këtë eksperiencë dhe çfarë mësimesh nxorrët?
Kaluam një periudhë të vështirë, por mendoj se skuadra dha prova të forta karakteri. Patëm faza të mira dhe të ndërlikuara, por në fund ia dolëm të përmbushnim qëllimin tonë. Kjo gjë na forcoi bindjen dhe na pajisi me përvojën e duhur për të kuptuar kërkesat e Superiores.
Prej disa kohësh jeni stërvitur në Bullgari. Si po shkon faza përgatitore nën udhëheqjen e trajnerit Arjan Bellai?
Stërvitjet po ecin në rrugë të mbarë. Intensiteti është i lartë, por kjo është e zakonshme për këtë fazë. Misteri dhe bashkëpunëtorët e tij po mundohen ta përgatisin sa më mirë formacionin dhe fryma në grup është tejet pozitive.
Vjet patët një duel të fortë në portë me Romeo Harizajn. Ky rivalitet pritet të vijojë dhe këtë sezon. Sa të shtyrë jeni për të rifituar një fanellë titullari?
Rivaliteti bën pjesë në futboll dhe i shërben mirë skuadrës. Ne të gjithë stërvitemi për të qenë gati dhe në fund vendimin e merr timonieri. Ajo që peshon më tepër është që ai që aktivizohet të japë gjithçka në shërbim të Vorës.
Gjatë merkatos, Vora ka sjellë disa elementë të rinj. Si po integrohen ata në grup dhe çfarë prisni të kontribuojnë?
Po ambientohen pa probleme. Zotërojnë cilësi dhe po sforcohen në maksimum që në momentet e para. Jam i mendimit se do të shtojnë garën në ekip dhe do të na bëjnë më të fortë përgjatë kampionatit.
Fati i hedhjes së shortit ju ka përballur me Dinamon në xhiron hapëse. Si e shikoni këtë takim dhe me çfarë ambiciesh do të nisë Vora këtë edicion?
Do të kemi një përballje të ashpër, ashtu siç ndodh rëndom në Superiore. Ne do ta studiojmë me imtësi dhe do të hyjmë në fushë për një rezultat të favorshëm. Qëllimi ynë është të bëjmë një sezon më cilësor se ai i mëparshmi dhe të shfaqemi sa më garues.
FSHF ka prezantuar një format të ri kampionati, me “play-off” dhe “play-out”. Mendoni se ky ndryshim i jep Vorës më shumë shanse për të kapur objektivat?
Bëhet fjalë për një formulë të re që do ta bëjë garën më tërheqëse. Fokusi ynë është te puna dhe e mendojmë kampionatin hap pas hapi. Duke ruajtur konsistencën dhe paraqitjet e mira, besoj se kemi mundësi t’i realizojmë synimet që ka klubi. / Ermal SPAHIU/
