Të mërkurën, policia në Gjermani zhvilloi një operacion të gjerë kontrollesh në kuadër të dyshimeve për korrupsion gjatë Kampionatit Evropian 2024.
Të lidhura
None found
Siç raportojnë mediat gjermane, mes tyre edhe BILD, një nga ambientet e verifikuara ishte edhe selia e Federatës Gjermane të Futbollit (DFB).
Prokuroria Publike e Bochumit, së bashku me Zyrën Shtetërore për Hetime Kriminale, bëri të ditur se çështja ka të bëjë me dyshime për “përfitime të paautorizuara”. Këto përfshijnë edhe marrjen e biletave për ndeshje futbolli nga një person i akuzuar, i cili në atë periudhë ishte i punësuar nga një qytet organizator i turneut.
Në deklaratën e përbashkët thuhet se përfaqësuesit e entitetit organizator u kishin dhënë qyteteve pritëse të drejtën ekskluzive të përparësisë për blerjen e biletave, të cilat më pas janë përdorur në mënyra të ndryshme nga këto qytete.
Sipas BILD, në bastisjet e kryera në orët e mëngjesit morën pjesë më shumë se 150 efektivë policie dhe hetimet lidhen me dy persona: një shtetas gjerman 66-vjeçar dhe një shtetas francez 46-vjeçar.
Nën dyshim është edhe shpërndarja e paligjshme e mijëra biletave brenda sistemit, të cilat besohet se janë dhënë për të ftuar të preferuar gjatë Euro 2024.
Si pjesë e procedurës hetimore, kontrolli është shtrirë edhe në bashkitë dhe administratat komunale të qyteteve pritëse.
Deri tani, autoritetet gjermane nuk kanë publikuar hollësi të tjera për fazën e hetimeve apo për persona të tjerë që mund të jenë të përfshirë në këtë çështje.
