Selaniku u trondit në orët e para të mëngjesit nga tre sulme të koordinuara me bomba artizanale gazi, të cilat kishin në shënjestër banesat e tre drejtuesve lokalë të partisë në pushtet, Demokracia e Re.
Ngjarja pati pasoja tragjike, pasi nëna e njërit prej drejtuesve lokalë ndërroi jetë në spital, si pasojë e plagëve të marra nga flakët dhe tymi që pushtoi pallatin.
Të lidhura
None found
Rasti më i rëndë u regjistrua në banesën e Afrodhiti Nestora. Lënda shpërthyese ishte vendosur në një automjet të parkuar pranë hyrjes së pallatit. Pas shpërthimit shpërtheu një zjarr i fortë dhe tymi u përhap në të gjithë godinën. Nëna e saj mbeti e plagosur rëndë teksa përpiqej të shuante zjarrin. Ajo u transportua e intubuar në repartin e terapisë intensive, por nuk mundi të mbijetonte.
Afrodhiti Nestora ndodhet ende në spital. Ajo ka pësuar djegie në duar dhe këmbë, si edhe vuan nga vështirësi në frymëmarrje për shkak të tymit. Në spital për probleme respiratore u dërgua edhe babai i saj, megjithatë gjendja e tij është më e mirë. Ndihmë të parë morën edhe dy banorë të tjerë të pallatit, të prekur nga tymi.
Dy shpërthimet e tjera u drejtuan ndaj banesës së kryetarit të Demokracisë së Re në Selanik, Zisis Ioakeimovits, si dhe asaj të ish-deputetit Savvas Anastasiadis. Në njërin prej rasteve mekanizmi ishte vendosur te hyrja e pallatit, ndërsa në tjetrin në një hapësirë përballë banesës, duke shkaktuar dëme materiale.
Shërbimi Antiterror ka marrë përsipër hetimin e çështjes. Autoritetet bëjnë të ditur se sulmet janë realizuar pothuajse në të njëjtën kohë, ndërsa kamerat e sigurisë kanë regjistruar një të ri, i cili dyshohet se ka vendosur një nga mekanizmat shpërthyes.
Ngjarja ka sjellë reagime të forta në politikë. Kryeministri Kyriakos Mitsotakis i dënoi sulmet, duke i cilësuar si akt terrorist, dhe vizitoi Selanikun i shoqëruar nga ministrat e Mbrojtjes së Qytetarit dhe Shëndetësisë. Ai theksoi se shteti do të mbajë tolerancë zero ndaj terrorizmit dhe premtoi se autorët do të zbulohen dhe do të përballen me drejtësinë.
