“Çmendet” PSG-ja, objektivi i radhës është Poul Pogba

Donnarumma, Wijnaldum, Hakimi, Sergio Ramos… Pogba. Paris Saint Germain nuk ka ndërmend të ndalet në merkato dhe pasi ka kompletuar katër afrime të bujshme, do të provojë të sjellë në “parkun e princave” pikërisht mesfushorin francez.

Al Khelaifi është i fiksuar pas triumfit në Ligën e Kampionëve dhe nuk dëshiron t’i lërë asgjë rastësisë, ndaj po shfrytëzon situatën e vështirë ekonomike në shumë klube, për të sjellë më të mirët në dispozicion të trajnerit Pochettino.

Sipas “L’Equipe”, drejtuesit e PSG-së kanë folur me Mino Raiolën për mundësinë e transferimit të Pogba në Francë dhe kanë marrë informacione nga ky i fundit se marrëveshja mund të mbyllet për shifrën e 80 milionë eurove, duke qenë se Manchester United dëshiron ta shesë këtë verë, për të mos e humbur me parametra zero verën e ardhshme.

Ndërkohë, Al Khelaifi ka urdhëruar që drejtuesit të pastrojnë organikën nga një grup futbollistësh si Rafinha, Icardi, Paredes, Sarabia, Herrera, Diallo, Kurzawa, Kehrer, etj., të cilët nuk bëjnë pjesë në planet e klubit.

Synimi është që me shitjen e këtyre futbollistëve të sigurohet një pjesë e mirë e parave që duhen për blerjen e Pogba, ndërsa ky i fundit duket vërtetë i joshur për të qenë pjesë e një formacioni yjesh, me emra si Donnarumma, Ramos, Hakimi, Verratti, Neymar e Mbappe.


Shtuar 8.07.2021 08:30

Tags: , ,