Julian Alvarez u ka bërë të ditur drejtuesve të Atletico Madridit se nuk dëshiron të vazhdojë stërvitjen me skuadrën, pasi sulmuesi argjentinas kërkon të largohet gjatë kësaj vere.
Të lidhura
None found
Futbollisti 26-vjeçar e mori këtë qëndrim pasi kërkesa e tij për të diskutuar me trajnerin Diego Simeone rreth një transferimi të mundshëm te Barcelona nuk u realizua. Drejtori ekzekutiv Miguel Angel Gil ndodhet me pushime, ndërsa tekniku i njohur si “El Cholo” nuk pranoi t’ia plotësonte dëshirën.
Sipas gazetës Mundo Deportivo, Alvarez mendon se trajnerit i mungoi guximi për t’u përballur drejtpërdrejt me të. Për këtë arsye, ai ua shprehu zhgënjimin e thellë drejtuesve që ndodheshin në ambientet e klubit.
“Mos u mbështetuni më tek unë”, mësohet se u ka thënë Alvarez zyrtarëve të pranishëm, siç raporton Mundo Deportivo.
Argjentinasi pretendon se drejtuesit i kanë dhënë që në muajin shkurt një zotim verbal se do ta lejonin të transferohej gjatë kësaj vere.
Barcelona ka interesim jashtëzakonisht të madh për ta afruar sulmuesin. Megjithatë, të gjithë tek Atletico tani po sillen sikur nuk janë të interesuar, ndërsa mbetet e paqartë se si do të marrë fund kjo sagë.
