Portali “Mësues për Shqipërinë” është kthyer në një shqetësim të madh për mësuesit e rinj që aspirojnë të bëhen pjesë e arsimit duke aplikuar nëpërmjet tij.
Në aplikacion “Mësues për Shqipërinë” mund të regjistrohesh lehtësisht duke përdorur si kod dy herë numrin personal të kartës së identitetit.
Por sa i sigurt është ky kod (në këtë rast ID), kur kujton që ID-të e të gjithë shqiptarve dhe jo vetem janë bërë publike nga grupi “Homeland Justice”.
Dhe për më tepër skandali nuk përfundon këtu, pasi vetë “Rrjeti Akademik Shqiptar”, të sqaron se si mund të regjistrohesh duke përdorur dy herë numrin personal në kartën e identitetit pa asnjë fjalëkalim tjetër.
Ndërkohë, pasi logohesh, sistemi nuk lejon askënd të ketë mundësinë të ndërrojë password-in e llogarisë së tij.
Kështu çdo person mund të futet me ID-në e një individi tjetër dhe t’i ndërhyjë në dosje, por dhe t’i përdorë këto të dhëna për motive të ndryshme.
Është vetë Ministria e Arsimit dhe Sportit që po e privon mësuesin nga mundësia për të mbrojtur të dhënat dhe dokumentacionin sensitiv që ka ngarkuar në portal.
Mbase znj.Evis Kushi, nuk e ka një informacion të tillë, mbase nuk është e informuar, por zyrtarët e saj duhet të dinë se ministria paguan një kosto shtesë për sigurinë kibernetike.
Në portalin e mësuesve, secili mësues ngarkon dosjen e tij personale, duke përfshirë të dhëna si: diploma, ID, libreza e punës, dhe informacione të tjera të rëndësishme.
Mungesa e një sistemi të sigurtë dhe detyrimi i vetëm për të shënuar ID-në dy herë për të hyrë në sistem e bën atë shumë të lehtë për të vjedhur të dhënat personale të mësuesve.
Pasojat e këtij mega skandali mund të jenë të rënda. Përveç shkeljes së konfidencialitetit të të dhënave personale, mesuesit janë në rrezik që të pësojnë vjedhjen e identitetit dhe të bien pre e abuzimeve.
Skandali i ruajtjes së të dhënave dhe konfidencialitetit në portalin e Mësues për Shqipërine ka shkelur Ligjin Nr. 9887, datë 10.3.2008, “Për Mbrojtjen e të Dhënave Personale”.
Ky ligj ka për qëllim të garantojë mbrojtjen e të dhënave personale të individëve dhe të sigurojë respektimin e privatësisë së tyre.
