Maqedoninë e pret një kthesë e fortë e motit, pas të ftohtit të pazakontë që të premten, më 24 korrik, solli reshje bore në Malin Sharr dhe në Pelister, si edhe pas mëngjesit të sotëm jashtëzakonisht të freskët për muajin korrik.
Të lidhura
None found
Sipas meteorologut Sllavço Poposki, që prej fillimit të javës mbi vend do të depërtojë një masë ajrore dukshëm më e ngrohtë nga jugu, konkretisht nga Afrika.
Poposki bën të ditur se nga e hëna dhe në ditët pasuese, temperaturat do të rriten me ritëm të shpejtë. Në shumicën e territorit të Maqedonisë, vlerat do të lëvizin mbi 30 deri në 35 gradë Celsius, ndërsa në Povardari dhe në zonat juglindore të vendit termometri do të shënojë deri në 38 gradë Celsius.
Ai sqaron se paqëndrueshmëri lokale parashikohen vetëm të hënën, më 27 korrik, kur mund të ketë rrebeshe shiu, bubullima dhe erë më të fuqishme.
Duke nisur nga e marta, më 28 korrik, kushtet atmosferike do të stabilizohen tërësisht. Moti do të jetë kryesisht me diell, i qëndrueshëm dhe vetëm me vranësira të pakta në zona të caktuara.
Meteorologu paralajmëron se kalimet e menjëhershme dhe të theksuara nga temperaturat e ulëta në ato të larta mund të ndikojnë negativisht, sidomos te njerëzit që janë të ndjeshëm ndaj ndryshimeve të motit.
