Ministria e Mbrojtjes bëri të ditur këtë të enjte se në territorin e Shqipërisë janë evidentuar 18 vatra zjarri. Prej tyre, 14 vazhdojnë të jenë aktive.
Forcat zjarrfikëse dhe strukturat e emergjencave po ndërhyjnë në terren për të izoluar dhe shuar flakët. Autoritetet po e mbajnë situatën nën vëzhgim, duke përqendruar operacionet në zonat ku zjarret kërcënojnë banorët ose territoret përreth.
Të lidhura
None found
Në njoftimin e Ministrisë së Mbrojtjes thuhet se deri në orën 18:00 të datës 13 gusht 2026, gjatë gjithë ditës, ishin raportuar në total 31 vatra zjarri.
Nga 18 vatrat që evidentohen aktualisht, 14 janë aktive, 2 po monitorohen dhe 2 të tjera janë vendosur nën kontroll.
Për përballimin e situatës po veprojnë në mënyrë të koordinuar strukturat qendrore dhe ato vendore. Forcat e Armatosura kanë angazhuar 309 efektivë, 22 mjete, 1 autobot, 3 ambulanca, 9 mjete zjarrfikëse, 3 helikopterë dhe 2 avionë Air Tractor.
Në Dajt të Tiranës, operacioni mbi tunelet e Qafë-Mollës po zhvillohet me 20 forca të MZSH-së dhe 10 punonjës të ADZM-së, të mbështetur nga 2 helikopterë të FA-së. Ndërkohë, në hapësirën Priskë e Madhe–Gurrë–Farkë–Lundër janë dislokuar 40 efektivë të MZSH-së, 8 automjete zjarrfikëse, 25 vullnetarë dhe 2 helikopterë të FA-së. Zonat e banuara nuk rrezikohen.
Në Abaze të Krujës, vatra mbetet aktive, ndërsa era ka ndihmuar përhapjen e zjarrit. Në ndërhyrje janë forcat operacionale, të cilat po asistohen edhe nga 1 helikopter i FA-së. Banesat nuk janë në rrezik.
Në Gurë-Lurë të Dibrës, flakët vazhdojnë me intensitet të lartë në dy drejtime. Perimetri pranë banesave është vënë nën kontroll, duke shmangur rrezikun e djegies së tyre. Në operacion marrin pjesë 120 forca bashkiake, 57 efektivë të FA-së, 15 policë, 15 vullnetarë dhe 9 punonjës të ADZM-së, ndërsa nga ajri ndërhyjnë 2 avionë Air Tractor.
Në Nëmerçkë dhe Dhëmbel të Përmetit, disa vatra vijojnë të djegin sipërfaqe pyjore dhe kullota në një terren të vështirë. Për shuarjen e tyre janë angazhuar zjarrfikës, punonjës të sektorit pyjor dhe vullnetarë. Nuk raportohet rrezik për zonat e banuara.
Në Trojë të Mirditës po vijojnë përpjekjet për izolimin e zjarrit. Në terren ndodhen forcat e MZSH-së, 36 forca bashkiake, 3 policë, 20 vullnetarë dhe 30 efektivë të FA-së.
Në Lugaxhi të Elbasanit, gjendja është rënduar për shkak se flakët kanë përfshirë kurorat e pishave. Për ndërhyrjen janë mobilizuar 6 efektivë të MZSH-së, 6 forca të pyjores, 5 punonjës të ASHP-së, 5 forca bashkiake dhe 30 vullnetarë, me mbështetjen e MZSH-së së Cërrikut. Zonat e banuara nuk janë të rrezikuara. Një vatër e re është konstatuar edhe në Shalës të Cërrikut, ku po operojnë 3 efektivë të MZSH-së me 1 automjet.
Në Dhivër të Finiqit, qarku Vlorë, po ndërhyjnë ekipet e MZSH-së nga Finiqi, Delvina, Konispoli dhe Dropulli. Në dispozicion janë 5 automjete zjarrfikëse, 10 efektivë, forca bashkiake dhe 1 helikopter i FA-së. Zjarri në Rumanxë është shuar tërësisht, kurse vatra në Dhrovjan është vënë nën kontroll.
Në zonën Mallakastër–Patos, vatrat e zjarrit në Drenie, Lofkënd dhe Ngraçije janë izoluar dhe po mbahen nën monitorim. Ndërhyrja vazhdon në ekonominë pyjore të Gjinoqarës. Në Kryezi të Fushë-Arrëzit, zjarri është nën kontroll, ndërsa në Rrencë dhe Goraj-Budishtë po punohet ende për izolimin e plotë të vatrave.
